थानकोट ।

चन्द्रागिरि नगरपालिका-०६ मातातिर्थस्थित बालागाउँ खेल मैदानमा जारी तेस्रो संस्करणको मातातिर्थ गोल्डकप फुटबल प्रतियोगितामा आज शुक्रबारबाट दोश्रो चरणका खेल सुरु हुँदैछन् ।

बिहीबार सम्पन्न समुह चरणका अन्तिम खेलमा विजयी हुँदै समतामुलक युथ क्लब र क्लिन भीजन अघिल्लो चरणमा स्थान बनाउन सफल रहे ।

समुह चरणको अन्तिम खेलमा गणेशमान स्मृति फुटसल क्लबमाथि ५-० को सहज जित हात पार्दै समतामुलक युथ क्लब दोश्रो चरणमा प्रवेश गर्यो । यस्तै प्रतिस्पर्धात्मक खेलमा ब्लुबेल फुटबल क्लबलाई पेनाल्टी सूटआउटमा पछि पार्दै क्लिन भीजनले प्रिक्वाटरफाइनलमा प्रवेश गर्यो । खेलमा क्लिन भीजन १२-११ गोलले अघि रह्यो ।

प्रतियोगिता अन्तर्गत आज दिनको १ बजे सिद्धीकाली युथ क्लब र किसिपिडी युथ क्लबबीच खेल हुनेछ । समुह चरणमा किसिपिडीले लोरेन युथ क्लबलाई पराजित गरेको थियो भने सिद्धीकाली सोझै दोश्रो चरणका लागि छनोट भएको हो ।

दिनको दोश्रो तथा अन्तिम खेलमा दिउँसो ३ बजे फार भीजन यूथ क्लब र द हिलिङ युथ क्लबबीच प्रतिस्पर्धा हुने तालिका रहेको छ । हिलिङ सोझै दोश्रो चरण खेल्ने अवसर पाएको हो भने समुह चरणमा निर्धारित खेलमा विपक्षी टोली अनुपस्थित भएपछि फार भीजनले पनि प्रतियोगितामा पहिलो खेल आज खेल्नेछ ।