थानकोट ।

नेपाल भ्रमणमा रहेकी बेलायतका अधिराजकुमारी डचेस सोफीले बुधबार कीर्तिपुरस्थित ‘कीर्तिपुर आँखा अस्पताल’को अवलोकन र सेवाग्राहीसँग भेटघाट गरेकी छिन् । 

नेपाल नेत्रज्योति संघद्वारा सञ्चालित कीर्तिपुर आँखा अस्पतालले २०७४ देखि सेवा दिँदै आएको छ ।

अस्पतालले बेलायतको विकास साझेदार संस्था ‘रिड्ली आइ फाउण्डेसन’का सहयोगमा नेपालका उच्च पहाडी क्षेत्रमा निःशुल्क मोतिविन्दु शल्यक्रिया शिविर सञ्चालन गर्दै आइरहेको छ ।

अधिराजकुमारी सोफी ‘द इन्टरनेसनल एजेन्सी फर द प्रिभेन्सन अफ ब्लाइन्डनेस (आइएपीबी)’ को ‘ग्लोबल एम्बेस्डर’ (विश्व सद्भावनादूत) छिन् । विश्वबाट नै उपचारपछि निको हुने अन्धोपन निवारण गर्ने अभियानमा सक्रिय उनले आँखा स्वास्थ्य क्षेत्रको विकास र विस्तारमा विश्वव्यापी रुपमा कार्य गर्दै आएकी छिन् । ‘आइएपीबी’ विश्वका आँखा स्वास्थ्य क्षेत्रमा कार्यरत संघ/संस्थाको साझा छाता संगठन हो ।

नेपालको आँखा स्वास्थ्य क्षेत्रमा भएको प्रगतिको प्रशंसा गर्दै उनले आगामी दिनमा नेपालले आफ्नो प्राथमिक स्वास्थ्य प्रणालीमा आँखा उपचार सेवालाई पनि अझ बलियो बनाउन सुझाव दिइन् । संघले आफ्ना सञ्जालमार्फत नेपालमा आँखा उपचार सेवा प्रवाह गरिरहेको र वार्षिक संघको सञ्जालमार्फत हजारौं आँखाका बिरामीले निःशुल्क आँखा उपचार प्राप्त गरिरहेका छन् ।