थानकोट।

सञ्चार तथा सूचना प्रविधि मन्त्रालय र राष्ट्रिय सूचना आयोगले हालै प्रदान गरेका पुरस्कारका बारेमा प्रेस सेन्टर नेपालले आफ्नो  धारणा सार्वजनिक गरेको छ । 

राष्ट्रिय पत्रकारिता दिवसको अवसरमा बुधबार सञ्चार तथा सूचना प्रविधि मन्त्रालयले प्रदान गरेको वरिष्ठ पत्रकार सम्मान र राष्ट्रिय पत्रकारिता पुरस्कार सत्तारूढ दलको दलीय भागबण्डामा छनोट गरिएको प्रेस सेन्टर नेपालले बताएको छ ।

‘देशभरका स्वतन्त्र, सक्रिय र श्रमजीवी पत्रकारलाई बञ्चित गरेर दलीय भागबण्डामा गरिएको पुरस्कार छनोटको प्रेस सेन्टर नेपाल घोर निन्दा गर्दछ, प्रेस सेन्टर नेपालका महासचिव मनोज घर्तीमगरद्धारा जारी प्रेस विज्ञप्तिमा भनिएको छ,सरकारको यस प्रकारको रवैयाले हजारौं पत्रकारलाई निराश बनाउनुको साथै पत्रकारितामा उनीहरुका योगदानको अवमूल्यन गरेको छ । यसले पत्रकारिता पुरस्कारको गरिमालाई कमजोर बनाएको छ ।’

संवैधानिक निकायको रूपमा रहेको राष्ट्रिय सूचना आयोगले हालै प्रदान गरेको विभिन्न पुरस्कारको छनोटमा स्पष्ट दलीय छायाँ परेको समेत प्रेस सेन्टर नेपालले बताएको छ ।

‘संवैधानिक निकायमा दलीय छायाँ पर्नु गम्भीर कुरा हो । संवैधानिक निकाय सूचना आयोगले आफ्नो स्वतन्त्रता गुमाएर दलीय छायाँमा गरेको निर्णयको प्रेस सेन्टर नेपाल घोर निन्दा गर्दछ,’जारी विज्ञप्तिमा अगाडि भनिएकाे छ ।

नेपाल सरकार, सञ्चार तथा सूचना प्रविधि मन्त्रालय र राष्ट्रिय सूचना आयोगले गरेको यस प्रकारको दलीय भागबण्डाको सामूहिक प्रतिवाद गर्न प्रेससँग सम्बन्धित सम्पूर्ण सरोकारवाला संघ–संस्थासँग सहकार्यका लागि प्रेस सेन्टर नेपालले आग्रह समेत गरेको छ । 

आगामी दिनमा पुरस्कार छनोट गर्दा दलीय भागबण्डाबाट मुक्त भई नेपालको संविधानले सुनिश्चित गरेको समानुपातिक समावेशीतालाई आत्मसात् गरेर विभिन्न जातजाति, भाषा र भूगोलका सक्रिय तथा श्रमजीवी पत्रकारहरूलाई पुरस्कार दिने मापदण्ड बनाउन सम्बन्धित पक्षको ध्यानाकर्षण समेत प्रेस सेन्टर नेपालले गराएको छ । 

सञ्चार तथा सूचना प्रविधि मन्त्रालय र राष्ट्रिय सूचना आयोगबाट पुरस्कृत सबै पत्रकारलाई प्रेस सेन्टर नेपाल बधाई ज्ञापन समेत गरेको छ ।