थानकोट ।

काठमाडौं महानगरपालिकाको फुटबल टिम गोदावरी मेयर कप फुटबल प्रतियोगिताको फाइनलमा प्रवेश गरेको छ ।

कीर्तिपुर नगरपालिकालाई ३-० ले पराजित गर्दै महानगरको टोली ‘उपत्यकाव्यापी खुला मेयर कप फुटबल खेल’को फाइनलमा प्रवेश गरेको हो ।

गोदावरी नगरपालिकाको चापागाउँ, ताहाखेल खेलमैदानमा मंगलबार भएको खेलमा महानगरपालिकाका लागि राजकुमार पौडेलले पहिलो गोल र त्यसपछि मनीष सेढाईंले लगातार दुई गोल गरेका थिए ।

महानगरपालिका ‘समूह बी’बाट र कीर्तिपुर ‘समूह डी’बाट सेमिफाइनल खेलमा पुगेका थिए ।  

सेमिफाइनलको अर्को खेल आज ‘समूह ए’ र ‘समूह सी’का विजेताहरू आयोजक गोदावरी नगरपालिका र काठमाडौंको दक्षिणकाली नगरपालिकाबीच हुनेछ ।

यस खेलका विजेता टिम र काठमाडौं महानगरपालिकाको टिमबिच आउँदो शुक्रबार फाइनल खेल हुने तालिका छ ।

विजेताले पाँच लाख रुपैयाँ हात पार्नेछ ।

काठमाडाैं महानगर साबिक विजेता हो भने चन्द्रागिरि साबिक उपविजेता थियो ।

प्रतियोगितामा काठमाडाैं उपत्यकाका २१ मध्ये १३ स्थानीयका फुटबल टोलीले सहभागिता जनाएका थिए । चन्द्रागिरि नगरपालिका प्रतियोगितामा १ खेलमा जित र १ खेलमा हार व्यहोर्दै समुह चरणबाटै घर फर्कियो ।