थानकोट ।

तत्कालीन ललितपुर उपमहानगरपालिका (हाल महानगरपालिका)का पूर्व मेयर तथा पूर्व मन्त्री बुद्धिराज बज्राचार्यको निधन भएको छ ।

उनको शनिबार ८९ वर्षको उमेरमा निधन भएको हो । बज्राचार्य २०५४ सालमा नेकपा एमालेबाट ललितपुर उपमहानगरपालिकाको मेयर निर्वाचित भएका थिए ।

२०२७ सालमा नगर पञ्चायतको वडाध्यक्ष भएका उनी २०३२ सालमा ललितपुर नगर पञ्चायतको प्रधानपञ्च निर्वाचित भएका थिए ।  बज्राचार्य २०६१ सालमा तत्कालीन राजा ज्ञानेन्द्र शाहको पालामा पर्यटनमन्त्री भएका थिए ।

विभिन्न कालखण्डमा ललितपुरको नगर प्रमुखको जिम्मेवारीमा रहेर उनले नगरको विकासमा महत्त्वपूर्ण योगदान पुर्‍याएको महानगरपालिकाले जनाएको छ । उनको निधनमा महानगरपालिकाले आइतबार महानगरभित्र सार्वजनिक बिदा दिएको छ ।

‘ललितपुर महानगरपालिकाको विकासको लागि उहाँले गर्नु भएको काम र निर्णय ज्यूँदो इतिहास भएर हामी सामु रहेको छ । महानगर गौरव पुरस्कारबाट समेत सम्मानित हुनु भएका उहाँले दिनु भएको सल्लाह, सुझाव हाम्रो लागि महत्त्वपूर्ण सम्पत्ति हुन्’, महानगर प्रमुख चिरीबाबु महर्जनले भनेका छन्, ‘ती सल्लाह, सुझावलाई शिरोधार्य गर्दछौं । भौतिक पूर्वाधार निर्माण सँगसँगै सामाजिक विकासमा महत्त्वपूर्ण योगदान पुऱ्याउनु हुने उहाँ हाम्रो स्मरणमा सदासर्वदा रहनु हुनेछ । उहाँको निधनमा भावपूर्ण श्रद्धाञ्जली अर्पण गर्दै दिवंगत आत्माको चीर शान्तिको कामना गर्दछु ।’