थानकोट ।

राष्ट्रिय खेलकुद परिषद् (राखेप) को ६२ औं वार्षिकोत्सवको अवसरमा शुक्रबार खेलाडी, प्रशिक्षक, संघ, कर्मचारी तथा खेलकर्मीलाई सम्मान गरिएको छ।

सम्मान अन्तर्गत करार सेवा पुरस्कारको प्रशिक्षकतर्फ काठमाडौं जिल्ला खेलकुद विकास समितिका सहायक कराते प्रशिक्षकद्वय संघरत्न महर्जन र कुशल श्रेष्ठलाई प्रदान गरिएको छ ।

पुरस्कारको राशी  जनही १० हजार रुपैयाँ रहेको छ । उनीहरूलाई युवा तथा खेलकुद मन्त्री तेजुलाल चौधरीले सम्मान गरेका थिए।

महर्जन चन्द्रागिरि नगरपालिका-१० सतुङ्गल बोसिगाउँस्थित धन बहादुर खेल प्रतिष्ठानका अध्यक्षसमेत हुन् ।

त्रिपुरेश्वरस्थित राखेप कभर्डहलमा शुक्रबार आफ्नो ६२औँ वार्षिकोत्सवको अवसरमा राखेपले खोखो विश्वकप उपविजेता (पुरुष र महिला) दुई टोलीसहित खेलकर्मीलाई उत्कृष्ट अवार्डबाट सम्मान गरेको हो । 

राखेपका अध्यक्षसमेत रहेका युवा तथा खेलकुद मन्त्री तेजुलाल चौधरी, राखेपका उपाध्यक्ष ध्रुव आचार्य र राखेपका सदस्यसचिव टंकलाल घिसिङ लगायतले उनीहरूलाई पुरस्कृत गरेका हुन् । 

राखेपले नेपाली खेलकुदमा योगदान दिएबापत खोखो टिमसँगै जुनियरमा दुई खेलाडी, पारामा एक खेलाडी, १० कर्मचारी, एक राष्ट्रिय खेल संघ, एक प्रायोजक, दुई पत्रकार र एक स्थानीय तहलाई सम्मान गर्‍यो । उक्त कार्यक्रममा खोखो पुरुष/महिला टोलीलाई समान एक लाख नगद पुरस्कारसहित ट्रफी प्रदान गरिएको थियो ।

गत वर्ष भारतमा सम्पन्न खोखो विश्वकपमा दुवै टोली उपविजेता बनेका थिए । साथै, नेपाल र भारतबीच भएको टेस्ट म्याचमा पनि नेपाली टोलीले रजत जितेका थिए । जुनियरको पुरुषमा बक्सिङका अर्पिल राना र महिलामा क्रिकेटकी पूजा महतो जनही ५० हजार नगदसहित सम्मानित भए । अर्पिलले थाइल्यान्डमा भएको एसियाली यू–२२ युथ बक्सिङ र श्रीलंकामा सम्पन्न एसियाली बक्सिङ यू–१९ मा कांस्य जितेका थिए ।

पूजा नेपाली यू–१९ महिला क्रिकेट टोलीकी कप्तान हुन् । उनको कप्तानीमा नेपालले विश्वकप पनि खेलेको थियो । उनले एसिया छनोटमा २७२ रन र १० विकेट पनि लिएकी थिइन् । उनी छनोटमा प्लेयर अफ द सिरिज पनि हुन् । साथै, उनी आईसीसी यू–१९ महिला टी ट्वान्टी विश्वकपमा मलेसियाविरुद्ध प्लेयर अफ द म्याच भएकी थिइन् । 

पेरिस पारालिम्पिककी कांस्य पदक विजेता पारा तेक्वान्दोकी पलेशा गोवर्धन ५० हजार नगदसहित सम्मानित भइन् । उनले मलेसियामा सम्पन्न १०औँ एसियाली पारा तेक्वान्दोमा कांस्य पदक जितेकी थिइन् । कार्यक्रममा उत्कृष्ट राष्ट्रिय खेल संघको अवार्ड नेपाल क्रिकेट संघ (क्यान), उत्कृष्ट प्रायोजकको अवार्ड नेपालय इन्टरनेसनल प्रा.लि. र उत्कृष्ट स्थानीय तहको अवार्ड मकवानपुरको वाग्मती गाउँपालिकाले प्राप्त गर्‍यो । यी सबै समान एक लाख नगदसहित सम्मानित भए ।

खड्का र शाक्य सम्मानित 
उत्कृष्ट खेलकुद पत्रकारबाट पुरुषमा खेलाडी डटकमका समाचार संयोजक अञ्जन खड्का र महिलामा मेरो खेल डटकमकी लक्ष्मी शाक्य सम्मानित भए । नेपाली खेलकुद क्षेत्रमा लामो समयदेखि कलम चलाउँदै आएका सिनियर पत्रकार खड्का नेपाल खेलकुद पत्रकार मञ्च (एनएसजेएफ)का महासचिव पनि हुन् । उनै खड्का र शाक्य जनही २० हजार र सम्मानपत्रसहित सम्मानित भए । खेलकुदमन्त्री चौधरी र सदस्यसचिव घिसिङले उनीहरूलाई सम्मान गरेका थिए । 

कर्मचारीतर्फ सर्वोत्कृष्ट परिषद् सेवा पुरस्कारबाट राखेपका नायब वरिष्ठ प्रशासकीय अधिकृत फणिन्द्रप्रसाद पौडेल (प्रशासन), दाङ जिल्ला खेलकुद विकास समितिका तेक्वान्दो प्रशिक्षक भीमलाल विक (प्रशिक्षण) पुरस्कृत भए । दुवैले जनही २५ हजार नगद पुरस्कार पाए ।

त्यस्तै, उत्कृष्ट परिषद् सेवा पुरस्कारको प्रशासनमा संघसंस्था समन्वय शाखाकी नायब वरिष्ठ प्रशासकीय अधिकृत प्रभा कर्माचार्य र प्रशिक्षणमा ललितपुर जिल्ला खेलकुद विकास समितिका तेक्वान्दो प्रशिक्षक तुल्सीनन्द वज्राचार्य जनही १५ हजार नगदसहित सम्मानित भए । परिषद् सेवा पुरस्कारको प्रशासनमा ललितपुर जिल्ला खेलकुद विकास समितिका प्रशासकीय अधिकृत बाबुकाजी श्रेष्ठ र प्रशिक्षणमा तालिम तथा प्रशिक्षण विभागकी नायब वरिष्ठ एथलेटिक्स प्रशिक्षक उषाकर्ण चौधरी सम्मानित भए ।