थानकोट ।

काठमाडाैंको कोटेश्वरस्थित भाटभटेनी सुपर मार्केट स्टोरमा बुधबार मृत भेटिएका व्यक्तिको पहिचान भएको छ ।

मृत भेटिने व्यक्ति रामेछापको खाँडादेवी गाउँपालिका वडा नम्बर–६ घर भएर ललितपुर बस्दै आएका २२ वर्षीय विकास रसाइली हुन् ।

जलेको अवस्थामा उनको अस्थिपञ्जरमात्र भेटिएको जिल्ला प्रहरी परिसर काठमाडाैंका एसपी अपिल बोहराले  बताए ।

ललितपुरको च्यासल बस्दै आएका रसाइली भदौ २४ मा साँझ काठमाडौँ महानगरपालिका वडा नम्बर ३२ स्थित कोटेश्वरमा रहेको भाटभटेनीको शाखामा आगजनी हुँदा त्यहाँ पुगेका थिए ।

चौथो तलामा उनी पुग्दा तलबाट उनीसँगै गएका अरू प्रदर्शनकारीहरूले आगो लगाए ।

आगोको लप्काको कारण ओर्लिन नसक्ने भएपछि उनले बुबालाई फोन गरेर भने, ‘बुबा, म भाटभटेनीको ४ तलामाथि ट्रयापमा परेँ ।’

त्यो कल उनको अन्तिम कल थियो ।

प्रहरीले उनको शवसँगै एउटा मोबाइल फेला पारेको छ ।

मोबाइलको प्राविधिक जाँच गर्दा रसाइलीकै रहेको पुष्टि भएको एसपी बोहराले जानकारी दिए ।

बुधबार सरसफाइ गर्दा चौथो तलामा उनको अस्थिपञ्जर फेला परेको हो ।

शव पोष्टमार्टमको लागी त्रिवि शिक्षण अस्पतालमा पठाइएको छ ।