थानकोट ।

चन्द्रागिरि नगरपालिका र धुनिवेशी नगरपालिकामा निर्माण भएको नागढुङ्गा सुरुङमार्ग प्रयोग गर्ने सवारी साधनका लागि सरकारले उपभोग दस्तुर (टोल शुल्क) निर्धारण गरेको छ ।

भौतिक पूर्वाधार तथा यातायात मन्त्रालयले बिहीबार नेपाल राजपत्रमा सूचना प्रकाशन गर्दै सवारी साधनको वर्गीकरण अनुसार शुल्क तोकेको हो ।

राजपत्रमा प्रकाशित सूचना अनुसार काठमाडौं उपत्यकाबाट बाहिरिनेभन्दा काठमाडाैँ भित्रिने सवारी साधनले बढी शुल्क तिर्नुपर्ने व्यवस्था गरिएको छ । सरकारले मन्त्रिपरिषद्को निर्णय अनुसार सडक बोर्ड ऐन, २०५८ को दफा ६ को उपदफा (१) ले दिएको अधिकार प्रयोग गरी उक्त दस्तुर लागु गरेको हो ।

कुन सवारी साधनलाई कति लाग्छ शुल्क ?

मन्त्रालयले सवारी साधनलाई ४ वर्गमा विभाजन गरेर शुल्क निर्धारण गरेको छ ।

पहिलो वर्गमा कार, भ्यान, पिकअप, ट्याक्टर, माइक्रो बस र अन्य हलुका सवारीलाई राखिएको छ । यस्ता सवारी साधनले काठमाडौं प्रवेश गर्दा ६५ रुपैयाँ र काठमाडौंबाट बाहिरिँदा ६० रुपैयाँ तिर्नु पर्नेछ ।

दोस्रो वर्ग अन्तर्गत मिनी बस, मिनी ट्रिपर/ट्रक रहेका छन् । यी सवारी साधनले काठमाडाैँ प्रवेश गर्दा ११५ रुपैयाँ र काठमाडौंबाट बाहिरिँदा ८० रुपैयाँ तिर्नु पर्नेछ ।

तेस्रो वर्गमा सिङ्गल रियर एक्सलयुक्त बस, ट्रक रहेका छन्। यी सवारीहरूलाई काठमाडाैँ प्रवेश गर्दा २६० रुपैयाँ र काठमाडौंबाट बाहिरिँदा २०० रुपैयाँ शुल्क निर्धारण गरिएको छ ।

चौथो वर्गमा मल्टी एक्सल ट्रक र भारी उपकरण रहेका छन् । यी सवारीले काठमाडौं प्रवेश गर्दा ६०० रुपैयाँ र काठमाडौंबाट बाहिरिँदा २५० रुपैयाँ शुल्क तिर्नुपर्छ।

सुरुङ मार्ग प्रयोग बापत तिर्नुपर्ने शुल्कको सूची हेराैं