थानकोट ।

राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले मध्यपूर्वी एसियाका विभिन्न देशमा बसोबास गरिरहेका नेपालीहरूलाई सुरक्षित रहन र उच्च सतर्कता अपनाउन आग्रह गरेका छन्।

शनिबार सामाजिक सञ्जालमार्फत वरिष्ठ नेता शाहले मध्यपूर्वमा सिर्जना भएको असामान्य परिस्थितिलाई मध्यनजर गर्दै यस्तो आग्रह गरेका हुन्।

उनले सम्बन्धित देशमा रहेका नेपाली राजदूतावासहरूको सूचनालाई ध्यान दिन र अत्यावश्यक अवस्थामा बाहेक घरबाहिर ननिस्कन अनुरोध गरेका छन्।

‘त्यहाँस्थित राजदूतावासले हालको असामान्य परिस्थितिलाई मध्यनजर गर्दै सबैलाई उच्च सतर्कता अपनाउन आग्रह गरेको छ,’ उनले सामाजिक सञ्जालमा लेखेका छन्, ‘कृपया सकेसम्म घरभित्रै सुरक्षित रहनुहुन, स्थानीय सुरक्षा निकायका निर्देशनहरू पूर्ण रूपमा पालना गर्नुहुन, अत्यावश्यक अवस्थामा बाहेक यात्रा नगर्नुहुन र नजिकैको सुरक्षित आश्रयस्थलको जानकारी राख्नुहुन अनुरोध गर्दछु।’

यसका साथै, आधिकारिक सूचना तथा समाचारको मात्र विश्वास गर्न र कुनै पनि आपत्कालीन अवस्थाका लागि नेपाली राजदूतावाससँग नियमित सम्पर्कमा रहन पनि उनले सबैमा ध्यानाकर्षण गराएका छन्।

नेकपा एमालेका अध्यक्ष केपी शर्मा ओलीले नेपालमा कुनै पनि आवरणमा मिसाइलको धुँवा प्रवेश नगरोस भन्ने कामना गरेका छन्। मध्यपूर्वमा भइरहेको मिसाइल आक्रमणका कारणले आफू निदाउन पनि नसकेको उल्लेख गर्दै उनले यस्तो कामना गरेका हुन्।

मध्यपूर्वमा भएका लाखौं नेपालीहरू आपत र कोलाहलमा भएकाले उनीहरूका परिवार पलपल छट्पटाएर बस्नु परेको अध्यक्ष ओलीको भनाइ छ। ‘मध्यपूर्वी देशहरू माथिको आकाशबाट बर्सिएका मिसाइलको धुँवाको दृष्यले आज निद्रा परेको छैन। ती देशमा लाखौं नेपाली आपत र कोलाहलमा छन्,’ अध्यक्ष ओलीले सामाजिक सञ्जालमा लेख्छन्, ‘तिनका परिवारले यहाँ पलपल छट्पटाएर बस्नु परेको छ।’

अवसर छनौटकाल लागि खुला विश्वमा आज संसारका नागरिक संसारैभरि आउनु जानु स्वाभाविक भएको अध्यक्ष ओलीको भनाइ छ। ‘अस्वाभाविक र खतरनाक त कुरा युद्ध र भूराजनीतिक चपेटा हो,’ अध्यक्ष ओलीले भने, ‘ति देशहरू पनि पक्कै युद्ध चाहँदैन थिए। तर शक्तिको स्वार्थ घुसेपछि विवश हुनुपर्ने।’

अध्यक्ष ओलीले नेपालमा अहिलेसम्म सौभाग्यवश मिसाइलको धुँवा भोग्नु नपरेको उल्लेख गरेका छन्। अध्यक्ष ओलीको प्रार्थना गर्दै भने, ‘कुनै पनि आवरणमा त्यो आउन नसकोस्। आज तपाईंहरूलाई छटपटी भइरहँदा म निदाउन सकिनँ। बेचैन छु।’

ओलीले सबैलाई सजगता र धैर्यता लिन आह्वान गरेका छन्। ‘यस बेला हाम्रो सजगता चाहिन्छ, धैर्य चाहिन्छ। विवेक, धैर्य र साहस–कामना गर्छ,’ अध्यक्ष ओलीले लेखेका छन्।

नेपाली कम्युनिष्ट पार्टीका संयोजक पुष्पकमल दाहालले नेपाली नागरिकको सुरक्षामा आँच आउन नदिन प्रभावकारी व्यवस्था मिलाउन सरकारसमक्ष माग गरेका छन्।

इरानमाथि अमेरिका र इजरायलबाट भएका आक्रमण तथा त्यसपछि विकसित घटनाले मध्यपूर्व क्षेत्रमा गम्भीर तनाव सृजना भएको उल्लेख गर्दै संयोजक दाहालले यस परिस्थितिप्रति गहिरो चिन्ता व्यक्त गरेका छन्।

‘यस स्थितिमा मध्यपूर्वमा कार्यरत लाखौँ नेपालीको सुरक्षा हाम्रो प्रमुख प्राथमिकता हो’, संयोजक दाहालले भेका छन्, ‘विकसित परिस्थितिको प्रत्यक्ष प्रभाव उनीहरूमा पर्न सक्ने भएकाले नेपाल सरकारलाई उच्च सतर्कता अपनाउन, आवश्यक कूटनीतिक पहल गर्न तथा कुनै पनि नेपाली नागरिकको सुरक्षामा आँच आउन नदिन प्रभावकारी व्यवस्था मिलाउन आग्रह गर्दछु।’