थानकोट ।

कालिकोटको तिलागुफा नगरपालिका-४ राँचुलीमा स्थानीय हेमराज शाहीको मलामी गएका १३ जनाको अवस्था अझै पत्ता लाग्न सकेको छैन् । पहिरोमा उनीहरू पुरिएका थिए । कालिकोटका प्रहरी प्रमुख प्रहरी नायब उपरीक्षक सिद्धराज न्यौपानेका अनुसार बेपत्ता भएकाहरूको खोजिका लागि १४ प्रहरीसहित स्थानीय खटिएका छन् । 

डीएसपी न्यौपानेका अनुसार विपद् व्यवस्थापन गण जुम्लाबाट १५ जना प्रहरी जनशक्ति घटनास्थलमा खटिएका छन्, तर भौगोलिक कठिनाइ र निरन्तर वर्षाका कारण उक्त टोली अझैसम्म पनि घटनास्थलसम्म पुग्न सकेको छैन् । डीएसपी न्यौपानेका अनुसार घटनास्थल नजिकका पहिरोको जोखिममा रहेका बस्तीहरूलाई सुरक्षित क्षेत्रमा जान अनुरोध गरिएको छ ।

प्रहरी र स्थानीयले खोजी कार्य जारी राखे पनि अझैसम्म पनि बेपत्ता भएकाहरूको कुनै जानकारी आउन नसकेको कालिकोटका प्रमुख जिल्ला अधिकारी रामहरि शर्माले जानकारी दिए । प्रतिकूल मौसमका कारण खोजी कार्यमा समस्या आएको प्रजिअ शर्माको भनाइ छ । लाश दहन गरिने क्षेत्रमाथिबाट ठूलो पहिरो गएकाले बेपत्ता भएकालाई तिला नदीले बगाएको हुन सक्ने प्रजिअ शर्माले बताएको नेपाल प्रेसमा खबर छ । 

आइतबार मलामी गएका तिलागुफा नगरपालिका वडा नम्बर ४ का ५९ वर्षीय वडाध्यक्ष परबहादुर शाही, ४७ वर्षीय कालिबहादुर शाही, ६३ वर्षका धनबहादुर शाही, ३१ वर्षका क्षेत्रजंग शाही, २८ वर्षीय खगेन्द्र शाही, २३ वर्षीय भेषबहादुर शाही, ५५ वर्षीय धन शाही, ७६ वर्षीय अलि शाही, २३ वर्षीय खेमराज शाही, ५७ वर्षीय भक्तबहादुर शाही, ४१ वर्षीय मोतिलाल शाही, २४ वर्षीय नरेश शाही, २३ वर्षीय प्रशान्त शाही सम्पर्कविहीन रहेका छन् ।