थानकोट ।

निर्वाचन आयोगले आगामी फागुन २१ गते हुने प्रतिनिधि सभा सदस्य निर्वाचनका लागि राजनीतिक दलहरूले पेस गरेको समानुपातिक निर्वाचन प्रणालीतर्फको बन्दसूचीबाट ७६ जना उम्मेदवारको नाम हटाएको छ।

उम्मेदवारको योग्यता, उजुरी र दलहरूबाट प्राप्त जानकारीका आधारमा छानबिन गर्दा मापदण्ड पूरा नभएकाहरूको नाम हटाइएको आयोगले जनाएको छ।

आयोगका प्रवक्ता नारायण प्रसाद भट्टराईका अनुसार प्रचलित कानुन बमोजिम तोकिएको योग्यता र अयोग्यतासम्बन्धी व्यवस्था तथा निर्वाचन आयोगले विभिन्न मितिमा गरेका निर्णयका आधारमा विवरण रुजु गरी यो निर्णय लिइएको हो।

आयोगले उम्मेदवारको विवरणमा रहेका त्रुटि र कानुनी अड्चनका आधारमा उनीहरूलाई बन्दसूचीबाट हटाउने निर्णय गरेको हो।

हटाइएका ७६ जनामध्ये सबैभन्दा धेरै २५ जना प्रदेश सभा सदस्यको बन्दसूचीमा समेत नाम समावेश भएका कारण अयोग्य ठहरिएका हुन्।

त्यसैगरी, कर्जा सूचना केन्द्रको कालो सूचीमा रहेका २१ जना, निर्वाचन आयोगले तोकेको जरिवाना भुक्तान नगरेका १० जना र सम्बन्धित राजनीतिक दलले नै नाम हटाउन लिखित अनुरोध गरेका १० जनाको नाम सूचीबाट हटाइएको छ।

अन्य कारणहरूमा २५ वर्ष उमेर पूरा नभएका ४ जना, मतदाता नामावलीमा नाम समावेश नभएका १ जना र पिछडिएको क्षेत्रको मतदाता नामावलीमा नाम नरहेका २ जना रहेका छन्।

यस्तै, महिला उम्मेदवार पेस गर्नुपर्ने ठाउँमा पुरुषको नाम समावेश भएको १ जना र माथि उल्लिखितमध्ये एकभन्दा बढी अयोग्यताको कारण रहेका २ जना उम्मेदवारको नाम पनि हटाइएको छ।