प्रधानमन्त्री दाहालको उपस्थितिमा भोलि बैशाख ३ गते नागढुङ्गा सुरुङ मार्गको ब्रेक-थ्रू हुँदै
थानकोट ।
राष्ट्रिय गाैरवको आयोजना नागढुङ्गा-सिस्ने खोला सुरुङ मार्गको मुख्य सुरुङ भोलि बैशाख ३ गते छिचोलिँदै छ ।
दिउँसो पाैने १ बजे प्रधानमन्त्री पुष्पकमल दाहालको उपस्थितिमा सुरुङ मार्गको मुख्य सुरुङ ब्रेक-थ्रू गर्ने आयोजनाको तयारी छ ।
सो क्रममा भौतिक पूर्वाधार तथा यातायात मन्त्री रघुवीर महासेठ समेतको उपस्थिति रहने आयोजना प्रमुख नविनमान श्रेष्ठले बताए ।
भोलि सुरुङ्गमार्ग ब्रेक-थ्रू भएपछि सञ्चालनमा आउन करिब १ वर्ष लाग्नेछ ।
भोलिबाट सडक मार्गको अन्तर्गत सुरुङ निर्माणको काम भने सकिनेछ ।
हालसम्म ७२ प्रतिशत सुरुङ मार्गको काम सम्पन्न भएको छ ।
जापान सरकारको करिब १६ अर्ब रुपैयाँ सहुलियतपूर्ण कर्जामा नेपाल सरकारको समेत लगानीमा बन्दै गरेको हो ।
धादिङस्थित धुनिबेँसी नगरपालिकाको सिस्ने खोलाबाट सुरू भई काठमाडौंको चन्द्रागिरि नगरपालिका-१ दहचोकस्थित टोटीपाखा नजिक निस्कने सुरुङ मार्ग दुरसञ्चार क्षेत्र नजिकै राष्ट्रिय राजमार्गमा जोडिनेछ ।