थानकोट ।

बैशाख २२ गते शनिबार चन्द्रागिरि नगरपालिकामा आयोजना हुने सम्पदा पदयात्राको सबै टिकट बिक्री भएको आयोजक संस्था चन्द्रागिरि हाइकर्स कम्युनिटीले जनाएको छ ।

सो कार्यक्रमका लागि निर्धारण गरिएका २ हजार २ सय टिकट मध्ये सबै बिक्री भएको कार्यक्रम आयोजकको दाबी छ ।

आयोजक संस्थाका अनुसार चन्द्रागिरि नगरका विभिन्न वडामा रहेका सम्पदाहरू समावेश गरी करिब २२ किलोमिटर दूरीको सम्पदा पैदल यात्रा आयोजनाको तयारी तिब्र बनाइएको छ । जसका लागि पैदल यात्राको रुटमा संकेत चिन्ह राख्ने कार्य समेत तिव्र गतिमा अघि बढिरहेको छ ।

चन्द्रागिरि नगरपालिका लगायत विभिन्न संघसंस्थासँगको सहकार्यमा चन्द्रागिरि नगरपालिका क्षेत्रमा पहिलोपटक बृहत् रूपमा सम्पदा पैदलयात्रा आयोजना हुन लागेको हो ।

पैदल यात्रा कार्यक्रम शनिबार बिहान ५ बजे चन्द्रागिरि नगरपालिकाको कार्यालय बलम्बुबाट सुरु भइ नगरका अधिकांश सम्पदास्थल परिक्रमा गरी नैकापस्थित खेलमैदानमा पुगी समापन हुने तालिका छ ।