प्रथम गोदावरी मेयर कपको फाइनल खेल गोदावरीमै हुने, फाइनल खेलको समयमा हेरफेर

थानकोट ।

ललितपुरको गोदावरी नगरपालिका आयोजना भइरहेको प्रथम गोदावरी नगरपालिका मेयर कप फुटबल प्रतियोगिताको फाइनल खेल भोलि (शनिबार) खेलाइँदैछ ।

लगातारको वर्षाका कारण पटक पटक स्थगित भएको प्रतियोगिताको सेमीफाइनल खेल हिजो बिहीबार च्यासलस्थित एन्फा टेक्निकल सेन्टरमा खेलाइएको थियो ।

फाइनल खेल भने गोदावरी नगरपालिका वडा नं. १० स्थित टाहाखेल मैदानमा खेलाइने गोदावरी नगरपालिकाको तयारी छ । यसअघि अपरान्ह ४ बजेका लागि तय भएको फाइनल खेल मध्यान्ह १२ बजे सुरु हुनेछ ।

उपाधिका लागि चन्द्रागिरि नगरपालिका र काठमाडाैं महानगरपालिकबीच खेल हुँदैछ ।

चन्द्रागिरिले सेमीफाइनलमा महालक्ष्मी नगरपालिका र काठमाडाैं महानगरपालिकाले सेमीफाइनलमा मध्यपुर थिमी नगरपालिकाको चुनाैती पन्छाउँदै उपाधि नजिक पुगेका थिए ।

जारी प्रतियोगितामा काठमाडाैं, ललितपुर र भक्तपुर जिल्लाका १३ स्थानीय तह र आयोजकका दुई टिम गरी विभिन्न १५ टिमले सहभागिता जनाएका थिए ।

प्रतियोगिताको विजेताले नगद पाँच लाख रूपैयाँ र दोश्रो स्थान टोलीले तीन लाख रूपैयाँ हात पार्नेछ । व्यक्तिगत विधाका विजेताले समान २५-२५ हजार रुपैयाँ पुरस्कार पाउनेछन् ।