थानकोट ।

प्रतिनिधि सभा निर्वाचनको दुई दिनअघि काठमाडौँको नैकाप र महाराजगन्जमा दुई वटा गाडी आगजनी गरेको अवस्थामा भेटियो ।

नैकापस्थित सिप्रदी ट्रेडिङ्गको कार्यालय नजिक मूल सडकमा बिएए २८३६ नम्बरको टोयोटा कार र महाराजगन्जमा बा.७ च. १४०१ नम्बरको मारुती भ्यान आगजनी गरेको आरोपमा प्रहरीले दुई जनालाई पक्राउ गरेर अनुसन्धान गरिरहेको छ । उनीहरूलाई भद्रकालीस्थित जिल्ला प्रहरी परिसर काठमाडौँको हिरासतमा राखेर प्रहरीले अनुसन्धान गरिरहेको छ ।

आगजनीमा संलग्न एकजना भदौ २३ र २४ मा भएको जेनजी प्रदर्शनका घाइते हुन् । नेप्लीज बिजेनस डाइरेक्टरी, वान क्लब र युकेबाट प्रदान गरिएको ‘गो फन्ड’ मार्फत एउटा समूहले उनलाई २५ हजार नगद सहयोग गरेको थियो । सहयोग रकम हस्तान्तरण गरेको भिडियो इन्स्टाग्राममा राखिएको छ । सो भिडियोमा ती उनले आफ्नो परिचय दिँदै भनेका छन्, ‘आन्दोलनमा मान्छे बचाउँदै गर्दा अर्को समूहले तलबाट आगो लगाएपछि दुई तलाबाट हाम्फाल्दा मेरो खुट्टा भाँचिएको हो ।’

जेनजी आन्दोलनमा खुट्टा भाँचिएर उपचार गराएका उनले दुर्गा प्रसाईं नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानमा आवद्ध भएको अनुसन्धानबाट थाहा भएको छ ।

फागुन २१ मा सम्पन्न प्रतिनिधिसभा सदस्य निर्वाचन बिथोल्ने प्रसाईं समूहको घोषणा अनुसार उनले फागुन १९ मा बिहान नैकापस्थित बल्खुपुल नजिकै बिएए २८३६ नम्बरको टोयोटा कार आगजनी गरेको प्रहरीको अनुसन्धान निष्कर्ष छ । जेनजी आन्दोलनका घाइते उनको साथबाट लागुऔषध ट्रामाडोल पनि बरामद गरिएको जिल्ला प्रहरी परिसर काठमाडौँका एसपी पवन भट्टराईले बताए । भट्टराईले भने– ‘उनको साथमा १० ट्याब्लेट ट्रामाडोल भेटिएको छ ।’