थानकोट ।

राष्ट्रिय स्वतन्त्र पार्टी (रास्वपा)का सांसद प्रशान्त उप्रेतीले मकवानपुरका सडकको अवस्था खराब रहेको बताएका छन् ।

मंगलबार (जेठ ५) प्रतिनिधि सभा बैठकमा उनले कैलाश, राक्सिराङ, थाहा, इन्द्रसरोवर, भीमफेदीलगायत पालिकाका कतिपय सडकमा एम्बुलेन्स समेत जान नसक्ने अवस्था रहेको बताए ।

“अब चार महिना त्यहाँका नागरिक आइसोलेसनमा बस्नुपर्ने अवस्था छ । एकातिर थाहामा उत्पादन भएको आलुको भाउ १० रुपैयाँ पुगेको छ,” उनले भने, “सडकका कारण उत्पादनको त्यहीँ उपभोग गर्नुपर्ने अवस्था छ ।”

उनले सडककै कारण एक टेलिसिरियलको जस्तो ‘आलुकै भात, आलुकै तरकारी खानुपर्ने’ अवस्था बनेको भन्दै कटाक्ष गरे ।

“यस्तो तरिकाले त हरिबहादुरले भनेजस्तो आलुकै भात, आलुकै अचार, आलुको तरकारी खानुपर्ने अवस्था थाहाको छ,” उनले भने, “अविलम्ब सडकको ठेकेदारलाई बोलाएर त्यसका बारेमा भौतिक प्रगति लिन हार्दिक अनुरोध गर्दछु ।”