थानकोट ।

राष्ट्रिय स्वतन्त्र पार्टी (रास्वपा)को पहिलो महाधिवेशनले सभापतिमा रवि लामिछानेलाई निर्विरोध निर्वाचित गरेको छ ।

रास्वपा केन्द्रीय निर्वाचन आयोगका प्रमुख भुवन केसीले पार्टी सभापतिका लागि मनोनयन दर्ता गर्ने अवधिभरमा लामिछानेको मात्रै उम्मेदवारी परेकाले निर्विरोध निर्वाचित भएको घोषणा गरेका हुन् । लामिछानेलाई सभापतिमा निर्वाचित गरियोस् भन्ने प्रस्ताव पार्टीको वरिष्ठ नेतासमेत रहेका प्रधानमन्त्री वालेन्द्र शाहले राखेका थिए ।

२०७९ सालको असार ७ गते घोषणा गरेको रास्वपाका संस्थापक सभापति लामिछाने चितवनमा चलिरहेको पहिलो महाधिवेशनबाट निर्विरोध निर्वाचित बनेका हुन् । अस्ति सोमबारका लागि तय भएको बन्द सत्र प्रतिनिधि छनोटमा देखिएको विवादका कारण ढिला भएर हिजो दिउँसो सवा ३ बजेमात्र बन्दसत्र सुरु भएको थियो ।

बन्दसत्रमा सभापति लामिछानेले राजनीतिक प्रतिवेदन, उपसभापति स्वर्णिम वाग्लेले अर्थ राजनीतिक प्रस्ताव, महामन्त्री कवीन्द्र बुर्लाकोटीले सङ्गठनात्मक प्रतिवेदन, सहमहामन्त्री विपिन आचार्यले विधान संशोधन प्रतिवेदन, कोषाध्यक्ष लिमा अधिकारीले लेखा प्रतिवेदन र रमाकान्त रिमालले अनुशासन आयोगको प्रतिवेदन पेस गरे ।

यसैबीच चुनावबाट आउने ९९ केन्द्रीय सदस्यहरूको निर्वाचन प्रक्रिया पनि सुरु भएको छ ।

केन्द्रीय सदस्यको उम्मेदवारी दर्ताका लागि २१ हजार शुल्क तोकिएको छ ।

केन्द्रीय सदस्यको उम्मेदवारले १ प्रस्तावक र २१ समर्थकको विवरण पनि पार्टीको निर्वाचन आयोगमा बुझाउनुपर्ने कार्यविधि छ ।

आयोगले आज बिहान ८ बजेदेखि मतदान सुरु गर्ने तयारी रहेको जनाएको छ ।

यसैबीच काठमाडाैं क्षेत्र नं. १० का सांसद् प्रदिप विष्टले रास्वपा केन्द्रीय सदस्य पदमा उमेदवारी दिएका छन् । उनले खस आर्य खुल्ला क्लष्टरबाट केन्द्रीय सदस्य पदमा उमेदवारी दर्ता गराएको उनको सचिवालयले जनाएको छ ।

रास्वपा संस्थापक केन्द्रीय सदस्य विष्णुकुमार श्रेष्ठले पनि केन्द्रीय सदस्य पदमा उमेदवारी दिएका छन् ।