थानकोट ।

 गत सोमबारको जेन-जी प्रदर्शनपछि एकाएक बदलिएको सामाजीक जीवन सामान्यकृत बन्न थालेको छ ।

सोमबार युवाहरूको प्रदर्शनमा प्रहरीले दमन गरेपछि निम्तिएको अराजकता सेना परिचालन, संसद् विघटन, नयाँ प्रधानमन्त्री नियूक्तिपछि क्रमशः शान्त हुन थालेको हो । 

आज आइतबार सडकमा सवारी साधनको संख्या उल्लेख्य छ, मानिसहरू दैनिक जीवनयापनका लागि गन्तव्यतर्फ लाग्न हतार गरिरहेका छन्। चोकचोकमा विद्यालयको सवारी साधन कुरेर विद्यार्थी तथा अभिभावकहरू उभिएका छन् । 

चन्द्रागिरि नगरका संस्थागत तथा सामुदायिक विद्यालय आज आइतबारबाट सुचारु हुने सम्बन्धित विद्यालयहरूले यसअघि नै जानकारी गराइसकेका छन् ।

आजबाट स्थानीय तहसहित सरकारी कार्यालयहरू खुल्ने भएका छन् । 

मंगलबारको तोडफोडपछि चन्द्रागिरि नगरपालिकासहित वडा तथा मातहतका कार्यालय बन्द रहेकोमा आजबाट खुल्ने भएका छन् । 

स्थानीयहरूले आफ्नो क्षेत्रमा भएका सरकारी भवन तथा संस्थाहरूको पुनःस्थापनाका लागि सहयोग जुटाउन थालेका छन् । 

प्रहरी वृत्त थानकोट, प्रहरी प्रभाग बलम्बु, प्रहरी प्रभाग नागढुङ्गा, प्रहरी प्रभाग मातातिर्थ, प्रहरी प्रभाग मच्छेगाउँले स्थानीयको सहयोगमा पुनः सेवा सुरु गरेका छन् ।