थानकोट ।

चन्द्रागिरि नगरपालिकाका मेयर घनश्याम गिरीले बेल्जियमको राजधानी ब्रसेल्समा यही दिसेम्बर ८ देखी १० सम्म युरोपियन युनियनको आयोजनामा सञ्चालन हुने अन्तर्राष्ट्रिय साझेदारीका लागि शहरहरू र क्षेत्रहरू २०२५ फोरम: स्थानीयकरण ग्लोबल गेटवे (सिटिज एण्ड रिजन फर इन्टरनेशनल पार्टनरसीप्स् फोरम-२०२५) मा सहभागिताका लागि अवसर पाएका छन् । 

शुक्रबार बिहान सामाजिक सञ्जालमार्फत मेयर गिरीले सो जानकारी दिएका हुन् । 

सम्मेलनअन्तर्गतको फोरममा युरोप र साझेदार देशहरूका स्थानीय र क्षेत्रीय नेताहरू, इयूका प्रतिनिधिहरू, अन्तर्राष्ट्रिय वित्तीय संस्थाहरू र अन्य सम्बन्धित नेताहरूले सहभागिता जनाउनेछन् । 

सो क्रममा इयूको ग्लोबल गेटवे रणनीतिलाई अगाडि बढाउन स्थानीय र क्षेत्रीय अधिकारीहरूको आवश्यक भूमिकाको बारेमा छलफल र तथा प्रस्तुति हुने बताइएको । 

तीन दिन सम्म जारी रहने सम्मेलनका सहभागीहरूले उच्च-स्तरीय प्यानलहरू, ब्रेकआउट सत्रहरू, र नेटवर्किङ अवसरहरूमा संलग्न हुने बताइएको छ । सो क्रममा निजी क्षेत्र र सार्वजनिक उपयोगिताहरूसँग भविष्यमा सहकार्यको लागि सम्भावित अवसरहरू अन्वेषण हुने अपेक्षा इयूको छ । 

सम्मेलनमा मेयर गिरीले नेपालको स्थानीय तहहरुको प्रतिनिधित्व गर्दै विश्वमा बढ्दो भू-राजनीतिक प्रतिस्पर्धा र विश्वव्यापी एजेन्डामा ढिलो प्रगतिद्वारा परिभाषित विश्वव्यापी सन्दर्भभित्र स्थानीय दृष्टिकोणले कसरी परिवर्तन ल्याउन सक्छ भन्ने विषयमा आफ्नो धारणा राख्ने तालिका रहेको छ ।

यसैगरी ग्लोबल गेट वे रणनीति र यसको दृष्टिकोणमा विशेष ध्यान केन्द्रित गर्दै, सम्मेलनले युरोप दृष्टिकोणलाई अगाडि बढाउन र दिगो विकास लक्ष्यहरूको स्थानीयकरणलाई तीव्र पार्न स्थानीय र क्षेत्रीय अधिकारीहरूको महत्वपूर्ण भूमिकाबारे जानकारी दिनेपनि बताइएको छ ।

प्रत्येक दुई वर्षमा आयोजना हुने यस खालको सम्मेलनले स्थानीय दृष्टिकोणलाई इयुको अन्तर्राष्ट्रिय साझेदारी र विकास सहयोगको केन्द्रमा राख्दै ग्लोबल गेट वे प्रमुख परियोजनाहरूमा संलग्न वा संलग्न हुन उत्सुक प्रमुख स्थानीय र क्षेत्रीय निर्वाचित प्रतिनिधिहरू र अधिकारीहरूलाई सहभागीको असर प्रदान गर्दछ । मेयर गिरी शनिबार बेल्जियमतर्फ प्रस्थान गर्नेछन् ।

चन्द्रागिरि नगरका मेयर घनश्याम गिरीले संयुक्त राष्ट्र संघको संयुक्त राष्ट्र पर्यावरण कार्यक्रम (यूएनएपी)ले जुन ३० देखी जुलाइ ३ सम्म स्पेनको सेभिल्लामा आयोजना गरेको विकासको लागि वित्तपोषण सम्बन्धी चाैथो अन्तर्राष्ट्रिय सम्मेलनमा समेत सहभागिता जनाएका थिए ।