थानकोट ।

फागुन २१ को निर्वाचन नजिकिएसँगै भदौ २३ र २४ गतेको आगजनी, तोडफोड र लुटपाटमा संलग्न रहेको आरोपमा पक्राउ परेकाहरू विरुद्ध मुद्दा दर्ताको संख्या समेत बढेको छ।

फागुन महिनाभर काठमाडौंमा मात्र १८ वटा घटनामा ४० भन्दा बढीमाथि मुद्दा दायर भएको छ। यसरी मुद्दा दायर हुनेमा केही राजनीतिक पार्टीका नेतादेखि टिकटकरसम्म छन्।

फागुन १८ सम्म दर्ता भएका १८ मुद्दामा कान्तिपुर टेलिभिजन जलाउनेदेखि सिंहदरबार जलाउने, प्रहरी कार्यालयको हतियार लुट्ने र व्यक्तिको घरभित्र प्रवेश गरेर गहना लगायतका सामग्री लुट्ने अभियुक्तहरू समेत छन्।

केही फरार छन् भने केहीलाई प्रहरीले पक्राउ गरेर अनुसन्धान गरेको थियो।

सिंहदरबार तोडफोड र आगजनीको आरोपमा सोमप्रसाद खनाल विरुद्ध मुद्दा दायर भएको छ। यसैगरी महाराजगन्ज प्रहरी कार्यालयमा तोडफोड, आगजनी र हतियार लुटेको अभियोगमा नुवाकोटका सुरेश रोक्का र सिन्धुलीका देवराज स्याङबा विरुद्ध मुद्दा भएको छ।

प्रहरी प्रभाग साँखुमा तोडफोड,आगजनी र लुटपाटको अभियोगमा मनोज भुजेलसहित १८ जना विरुद्ध मुद्दा दायर भएको छ। तारागाउँ म्युजियम तोडफोडमा संलग्न रञ्जित खड्गीसहित ६ जना र बौद्ध प्रहरी कार्यालय आगजनी र तोडफोडमा संलग्न रहेको अभियोगमा समीर श्रेष्ठ विरुद्ध मुद्दा दायर भएको छ।

ममता प्रसाईँ र मिलन मगर दीपककुमार कार्कीको घरमा छिरेर तोडफोड र लुटपाट गरेको र १५ तोला सुन र ३ सय तोला चाँदीसहित भान्साका सामग्रीहरू चोरेको अभियोगमा प्रतिवादी बनेका छन्।

थानकोट प्रहरीमा तोडफोड र आगजनी गरेकोमा १ जना र चन्द्रागिरि हिल्सको केबलकारको बेस स्टेशनमा भएको तोडफोडमा संलग्न २ जना विरुद्ध मुद्दा दायर भएको छ।

प्रहरी प्रभाग सुन्दरी जल तोडफोड गर्ने आशिष तामाङ, प्रहरी वृत्त सिंहदरबार तोडफोड गर्ने सुरेश तामाङ, सिंहदरबार जलाउने चितवनका महेन्द्र गौतम, गोकर्णको प्रहरी कार्यालय तोडफोड गर्ने विष्णु कुमाल, कान्तिपुर टेलिभिजनको भवन आगजनी र तोडफोडमा नवीन कार्की र एक राजनीतिक दलका नेता र बलम्बु प्रहरी कार्यालय तोडफोड र आगजनी गरेको अभियोगमा पाँच जनाविरुद्ध आपराधिक उपद्रवमा मुद्दा दायर भएको उकेरामा खबर छ।