थानकोट ।

नेपाल रेडक्रस सोसाइटीअन्तर्गत सञ्चालन हुँदै आएको सबै तहको निर्वाचन प्रक्रिया हालका लागि स्थगित गरिएको छ।

जिल्ला प्रशासन कार्यालय काठमाडौँको निर्देशनपछि केन्द्रीय कार्यालयले आइतबार परिपत्र जारी गर्दै जारी निर्वाचन तालिका स्थगित गर्ने निर्णय गरेको हो। यसअघि असार मसान्तभित्र सबै तहका निर्वाचन सम्पन्न गर्ने तयारी गरिएको थियो।

निर्धारित कार्यतालिका अनुसार पालिका शाखाको निर्वाचन वैशाख २६ देखि जेठ ४ सम्म, जिल्ला शाखाको जेठ १५ गते, प्रदेश समितिको असार २ गते तथा केन्द्रीय समितिको निर्वाचन असार २४ र २५ गते हुने तय भएको थियो।

महामन्त्री मीनबहादुर मल्लले प्राप्त निर्देशनअनुसार हाल सुरु गरिएको सम्पूर्ण निर्वाचन प्रक्रिया अर्को सूचना नआएसम्म स्थगित गर्नुपर्ने व्यवस्था गरिएको जानकारी दिएका छन्।

केन्द्रीय कार्यालयले यसबारे सबै प्रदेश कार्यालय, जिल्ला शाखा तथा पालिका समितिहरूलाई औपचारिक रूपमा परिपत्र पठाइसकेको छ।

यसअघि जिल्ला प्रशासन कार्यालय काठमाडौँले दुई दिनअघि नै निर्वाचन प्रक्रिया तत्कालका लागि रोक्न निर्देशन दिएको थियो। प्रशासनले संस्थागत सुधार तथा शुद्धीकरणको आवश्यकता औँल्याउँदै उक्त कदम चालिएको जनाएको छ।