थानकोट ।

आईसीसी विश्वकप लिग-२ अन्तर्गत अमेरिकाविरुद्धको खेलमा नेपालले सहज जित निकालेको छ ।

शुक्रबार भएको खेलमा नेपालले अमेरिकालाई १ सय २२ रनको विशाल अन्तरले हराएको हो ।

नेपालले दिएको ३ सय १८ रनको लक्ष्य पछ्याएको अमेरिका ४१.२ ओभरमा १ सय ९५ रन बनाएर अलआउट भयो ।

अमेरिकाका लागि सञ्जय कृष्णमुर्तीले ५६, शयान जहांगिरले २७, शेहान जयसुर्याले २६, नोस्थुस केन्जिगेले २४, सैतेजा मुक्कमल्लाले २२, मिलिन्द कुमारले १२ रन बनाए ।

अन्य ब्याटरले दोहोरो अंकमा रन बनाउन सकेनन् । नेपालका लागि सन्दीप लामिछानेले तीन, ललित राजवंशी, दीपेन्द्रसिंह ऐरी र गुलशन झाले दुई–दुई विकेट लिए । सोमपाल कामीले एक विकेट लिए ।

यसअघि कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ गरेको नेपालले निर्धारित ५० ओभरमा ८ विकेट गुमाएर ३ सय १७ रन बनाएको हो । नेपालका लागि इशान पाण्डेले ८४ तथा दीपेन्द्रसिंह ऐरीले ५९, कप्तान रोहित पौडेलले ४६, आसिफ शेखले ४३ तथा कुशल भुर्तेलले २९ रन प्रहार गरे । अमेरिकाका शुभम रञ्जनेले तीन विकेट लिएका थिए ।