थानकोट ।

दक्षिण एसियाली देशहरूको ठूलो प्रतियोगिता महिला साफ च्याम्पियनसिपको सेमिफाइनलमा नेपालले आज बुधबार बङ्गलादेशसँग खेल्दैछ ।

खेल भारतको गोवामा रहेको पण्डित जवाहरलालनेहरु रङ्गशालामा दिउँसो सवा ४ बजे शुरु हुनेछ ।

विगत पाँच वर्षयता नेपाल बङ्गलादेशसँग पराजित हुँदै आएको छ ।

सन् २०२२ र २४ मा भएको साफ च्याम्पियनसिपको फाइनलमा बङ्गलादेशले नेपाललाई हराउँदै प्रतियोगिताको उपाधि जितेको थियो ।

नेपाली महिला टोलीका मुख्य प्रशिक्षक नवीन न्यौपानेले बङ्गलादेशसँगको खेलमा आफ्नो टोली शारीरिक र मानसिक रूपमा बलियो रूपमा प्रस्तुत हुने बताउनुभयो ।

समूह चरणको खेलमा नेपालले भुटानलाई १–० र श्रीलङ्कालाई २–० गोलले हराउँदै सेमिफाइनलमा पुगेको हो ।

बङ्गलादेशले समूह चरणको खेलमा माल्दिभ्सलाई हराउँदा भारतसँग हार बेहोरेको थियो ।

आजै भारत र भुटानबीचको दोस्रो सेमिफाइनल खेल राति सवा ८ बजे हुनेछ ।