थानकोट ।

राष्ट्रिय खेलकुद परिषद् (राखेप) को उपाध्यक्षमा पूर्व राष्ट्रिय फुटबल टोलीका गोलकिपर विशाल श्रेष्ठ नियुक्त भएका छन्। सरकारको निर्णय अनुसार श्रेष्ठलाई उपाध्यक्ष पदमा जिम्मेवारी दिइएको हो।

त्यसैगरी राखेपमा चार जना नयाँ सदस्य पनि मनोनीत गरिएको छ। नियुक्त हुने सदस्यहरूमा पूर्व राष्ट्रिय क्रिकेटर शक्ति गौचन, सिक्का सुवाल श्रेष्ठ, पवन शाही र मोनालिसा खम्बू रहेका छन्।

नवनियुक्त उपाध्यक्ष श्रेष्ठ लामो समय नेपाली राष्ट्रिय फुटबल टोली तथा विभिन्न क्लबबाट व्यावसायिक खेल जीवनमा सक्रिय रहेका थिए। उनी राष्ट्रिय टोलीका प्रमुख गोलकिपरका रूपमा परिचित छन्।

त्यसैगरी सदस्यमा नियुक्त गौचन नेपाली राष्ट्रिय क्रिकेट टोलीका पूर्व खेलाडी हुन्, जसलाई देशको क्रिकेट इतिहासमा प्रभावशाली स्पिनरमध्ये एकका रूपमा लिइन्छ।

सरकारी निर्णयपछि नवनियुक्त पदाधिकारीहरूबाट खेलकुद क्षेत्रको संस्थागत सुधार, प्रशासनिक सुदृढीकरण तथा खेलाडी हितमैत्री नीति निर्माणमा योगदान हुने अपेक्षा गरिएको छ।

राखेप नेपालको खेलकुद क्षेत्रको केन्द्रीय निकाय हो, जसले खेलकुद गतिविधिको सञ्चालन, समन्वय तथा विकासका कार्य गर्दै आएको छ।