राप्रपा बागमती प्रदेश अध्यक्षमा तीनजना आकांक्षी

थानकोट ।

राष्ट्रिय प्रजातन्त्र पार्टी (राप्रपा)को बागमती प्रदेश अध्यक्षका लागि तीन जना आकांक्षी देखिएका छन् ।

बागमती प्रदेश अध्यक्षका लागि प्रकाश रिमाल, जनकराज पाठक र रविन्द्र प्रताप शाह, आकांक्षी देखिएका हुन् । रिमाल काठमाडौंका हुन् भने शाह भक्तपुरका हुन् । यस्तै पाठक नुवाकोटका हुन् ।

राप्रपाका एक नेताका अनुसार अध्यक्ष राजेन्द्र लिङ्देन पक्षबाट प्रकाश रिमाल र लिङ्देनइतर पक्षबाट जनकराज पाठक र रविन्द्र प्रताप शाह आकांक्षी रहेका हुन् । लिङ्देनइतर पक्षबाट भने एक जना मात्र उम्मेदवार बनाउने गरी सहमतिको प्रयास भइरहेको छ ।

राप्रपाले आगामी असोज २१ गते सातवटै प्रदेशको अधिवेशन एकैदिन गर्ने तयारी गरेको छ । जिल्ला अधिवेशन सम्पन्न गर्दै प्रदेश अधिवेशनको तयारीमा जुटेको राप्रपाले बागमतीसहित सातै प्रदेशमा केन्द्रीय निर्वाचन प्रतिनिधि खटाइसकेको छ ।

राप्रपाको बागमती प्रदेश अधिवेशनका लागि केन्द्रीय निर्वाचन समितिका सदस्य प्रा.डा. जयन्तनाथ खनाललाई केन्द्रीय निर्वाचन प्रतिनिधि तोकिएको छ ।

राप्रपाले मंसिर २६ देखि २८ गतेसम्म काठमाडौंमा केन्द्रीय महाधिवेशन गर्ने निर्णय गरेको छ ।