थानकोट ।

नेपाली कांग्रेसको १५औँ महाधिवेशनको तयारी तीव्र बनेको छ ।

संस्थापन इतर समूहले देशभरका ६ हजार ७४३ वडामध्ये तीन हजार १९१ वडामा अधिवेशन सम्पन्न गरेको जनाएको छ ।

संस्थापन इतर समूहको केन्द्रीय निर्वाचन समितिका अनुसार हिजो सम्पन्न वडा अधिवेशनअन्तर्गत कोशी प्रदेशका एक हजार १५७ वडामध्ये ५७७, मधेसका एक हजार २७१ मध्ये ४०२, बागमतीका एक हजार १२१ मध्ये ५६३ र गण्डकीका ७६२ मध्ये ३६६ वडामा अधिवेशन सम्पन्न भएको छ ।

यस्तै, लुम्बिनी प्रदेशका ९८३ वडामध्ये ५५०, कर्णालीका ७१५ मध्ये २७७ तथा सुदूरपश्चिमका ७३४ वडामध्ये ४५६ वडामा अधिवेशन सम्पन्न भएको निर्वाचन समितिले जनाएको छ । संस्थापन इतर समूहको १५औँ महाधिवेशन आगामी मङ्सिर २१ देखि २३ गतेसम्म गर्ने तय भएको छ ।

चन्द्रागिरिका १५ मध्ये ५ वडामा बिहीबार अधिवेशन सम्पन्न भएको छ । चन्द्रगिरि नगरपालिका वडा नं. ८ मातातिर्थ, वडा नंं ९ मच्छेगाउँ, वडा नंं १२ बलम्बु, वडा नं. १४ नयाँ नैकाप, वडा नं. १५ तीनथानामा बिहीबार अधिवेशन सम्पन्न भएको हो । बाँकी वडामा भोलि शनिबारसम्म अधिवेशन सम्पन्न गर्ने नेपाली काँग्रेस इतर पक्षले जनाएको छ ।

यसैबीच कांग्रेसको संस्थापन पक्षमा महाधिवेशनको तयारी अघि बढेको छ । संस्थापन पक्षले पर्सि काठमाण्डौमा महाअधिवेशन उद्घाटन गर्दैछ । महाधिवेशन नजिकिँदै जाँदा संस्थापन पक्षमा विभिन्न पदका लागि आकांक्षीको संख्या बढ्दै गएका छन् ।