थानकोट ।

चन्द्रागिरि नगर क्षेत्रसहित काठमाण्डौ उपत्यकासहित कोशी, बागमती र गण्डकी प्रदेशका केही ठाउँमा वर्षा हल्कादेखि मध्यम वर्षा भइरहेको छ । महाशाखाकाअनुसार लुम्बिनी र कर्णाली प्रदेशका एक/दुई ठाउँमा पनि हल्का पानी परेको छ ।

जल तथा मौसम पूर्वानुमान महाशाखाका मौसमविद् हरिप्रसाद दाहालकाअनुसार अहिले सक्रिय प्रणाली पूर्वतर्फ सर्ने क्रममा रहेकाले आज रातिदेखि यसको प्रभाव कमजोर हुँदै जानेछ र भोलि दिउँसो वर्षाको सम्भावना कम रहनेछ ।

राति कोशी, मधेश, बागमती र गण्डकी प्रदेशसहित हिमाली भू–भागका केही ठाउँमा हल्कादेखि मध्यम वर्षा तथा हिमपातको सम्भावना छ । भोलि देशका धेरैजसो ठाउँमा आजको तुलनामा मौसम सामान्यतया सुधार हुनेछ ।

कोशी, बागमती र गण्डकी प्रदेशका पहाडी तथा हिमाली भू–भागका थोरै ठाउँहरूमा मेघगर्जन–चट्याङसहित हल्का वर्षाको सम्भावना रहे पनि तराईका धेरै क्षेत्रमा मौसम मुख्यतया सफा रहनेछ ।

यसैबीच सुदूरपश्चिम र लुम्बिनी प्रदेशको तराई क्षेत्रमा तातो दिन कायमै रहने महाशाखाले जनाएको छ । तर पर्सिदेखि भने पानी पर्ने प्रणाली थप सक्रिय हुने मौसमविद् दाहालले जानकारी दिनुभयो ।

पर्सि कोशी, बागमती र गण्डकी प्रदेशका केही ठाउँसहित अन्य प्रदेशका पहाडी तथा हिमाली भू–भागका थोरै ठाउँमा मेघगर्जन–चट्याङसहित मध्यम वर्षाको सम्भावना रहेको छ भने तराईका केही क्षेत्रमा पनि वर्षा हुन सक्ने देखिएको छ । मौसम प्रणाली फेरि सक्रिय हुन सक्ने भएकाले सम्भावित वर्षा, चट्याङ र अन्य जोखिमबाट बच्न आवश्यक सतर्कता अपनाउन महाशाखाले आग्रह गरेको छ ।