थानकोट ।

भारतका युवा ब्याटर वैभव सूर्यवंशीले अन्तर्राष्ट्रिय क्रिकेटमा सबैभन्दा कम उमेरमा अर्धशतक प्रहार गर्ने नेपालका कुशल मल्लको विश्व कीर्तिमान तोडेका छन्।

जिम्बावेविरुद्धको पहिलो टी-२० अन्तर्राष्ट्रिय खेलमा विस्फोटक अर्धशतक बनाउँदै सूर्यवंशीले मात्र १५ वर्ष ११४ दिनको उमेरमा यो नयाँ इतिहास रचेका हुन्।

यसअघि समग्र अन्तर्राष्ट्रिय क्रिकेट इतिहासमै सबैभन्दा कम उमेरमा अर्धशतक बनाउने कीर्तिमान नेपालका कुशल मल्लको नाममा थियो।

कुशलले सन् २०२० मा काठमाडौंको कीर्तिपुरस्थित मैदानमा अमेरिकाविरुद्धको एकदिवसीय खेलमा १५ वर्ष ३४० दिनको उमेरमा अर्धशतक प्रहार गर्दै विश्व कीर्तिमान कायम गरेका थिए।

सूर्यवंशीले टी-२० अन्तर्राष्ट्रियमा यो कीर्तिमान आफ्नो नाममा लेखाएका हुन्। यद्यपि, एकदिवसीय क्रिकेटको इतिहासमा भने कुशल मल्लको विश्व कीर्तिमान अझै पनि यथावत् छ।

जिम्बावेको हरारेमा १२६ रनको लक्ष्य पछ्याएको भारतका लागि ओपनरका रूपमा आएका सूर्यवंशीले ४ चौका र ४ छक्काको मद्दतमा मात्र १९ बलमा ५० रनको योगदान दिए। उनको स्ट्राइक रेट २६३.१५ रहेको थियो।

खेलमा टस हारेर पहिले ब्याटिङ गरेको घरेलु टोली जिम्बावेले २० ओभरमा ७ विकेट गुमाएर १२५ रन बनाएको थियो। जिम्बावेका लागि वेस्ली मधेवेरेले सर्वाधिक ३९ रन र तदिवानाशे मरुमानीले अविजित २७ रन बनाए।

भारतका लागि मयङ्क यादव र प्रिन्स यादवले २-२ विकेट लिएका थिए।