थानकोट ।

विद्यार्थी बोकेको बस साँखुमा दुर्घटना भएको भन्दै आइतबार पुरानो भिडियो सामाजिक सञ्जालमा पोस्ट गरिएको छ ।

फेसबुकमा विभिन्न नामका पेजबाट पुरानो भिडियो पोस्ट गरिएका छन् ।

नगरकोट पिकनिक गएर फर्किने क्रममा साँखुमा बस दुर्घटना र तीन विद्यार्थीको मृत्यु भन्दै फेसबुकमा भिडियो पोस्ट भएको हो ।

तर आइतबार साँखुमा कुनै पनि बस दुर्घटना नभएको महानगरीय प्रहरी प्रभाग साँखुका प्रहरी निरीक्षक रमेश थापाले जानकारी दिए । ‘साँखुमा कुनै पनि दुर्घटना भएको छैन् । पुरानो भिडियो पोस्ट गरेर फेक न्युज फैलाएछन् । हामीलाई नि सबैतिरबाट फोन गरेर सोध्नु भएको छ । हैरानै बनाइसके,’ प्रहरी निरीक्षक थापाले भने ।

आइतबार पोस्ट गरिएको भिडियो भने २०८१ माघ २७ गतेको हो । त्यतिबेला सुर्खेतबाट कुम्भ मेलाका तीर्थयात्री लिएर जाँदै गरेको बस बबई नजिक दुर्घटना भएको थियो ।

भे १ ख ४३३१ नम्बरको बस बबईभन्दा १ किलोमिटरअघि सुर्खेतपट्टि दुर्घटना भएको थियो ।

इकान्तिपुरबाट