थानकोट ।

काठमाडौं महानगरपालिका (कामपा)ले सामाजिक सुरक्षा भत्ता प्राप्त गर्ने व्यक्तिलाई निःशुल्क स्वास्थ्योपचार प्रदान गर्ने भएको छ । जसअन्तर्गत ज्येष्ठ नागरिक, एकल महिला, हिंसामा परेका, अपांगता भएका, लैंगिक हिंसामा परेका जोकोही व्यक्तिलाई निःशुल्क उपचार गर्ने प्रक्रिया कामपाले अघि बढाइसकेको जनाएको छ । 

उपचार गर्नका लागि कामपाले छत्रपाटी निःशुल्क चिकित्सालयसँग चालु आर्थिक वर्षका लागि सम्झौता गरिसकेको कामपाकी उपप्रमुख सुनिता डंगोलले जानकारी दिइन् ।

उनले पारिवारिक समस्याका कारण आफ्नो कोही नभएर उपचारमा जान नसक्नेहरू पनि महानगरपालिका छन् भन्ने महसुस हुन थाल्नु सुखद नतिजा  भएको बताइन् ।

कामपाका प्रमुख प्रमुख प्रशासकीय अधिकृत सरोज गुरागाईंले आवश्यक पर्नेले सजिलै सेवा प्राप्त गर्ने र सम्भावित दुरुपयोग रोक्ने प्रणालीबाट सेवा प्रवाह गर्न अस्पताललाई आग्रह गरे । 

अस्पतालका अध्यक्ष डा. मनोजमान श्रेष्ठले भने, “स्वास्थ्योपचारमा महत्त्व नदिने पाका व्यक्तिहरू उपचारका लागि आउन थाल्नु, समुदायका मानिस उपचारका बारेमा सोधखोज गर्न थाल्नु, कामपाको सहयोग प्राप्त भएको नतिजा हो ।” 

सम्झौताबमोजिम कामपाका जनप्रतिनिधि र कर्मचारीलाई पनि उपचार सेवा उपलब्ध हुनेछ । महिला कर्मचारी तथा जनप्रतिनिधिलाई म्यामोग्राम सेवा उपलब्ध गराइनेछ । त्यस्तै, लैङ्गिक हिंसामा परेका व्यक्ति, बेवारिसे, एकल महिला, अपांगता भएका र सिटी स्क्यान गर्नुपर्ने कर्मचारीका लागि सामाजिक विकास विभागको सिफारिस आवश्यक पर्नेछ । यसरी गरिएको उपचार खर्च महानगरपालिकाले व्यहोर्नेछ । 

उपचारका लागि महानगरपालिकाले चालु आवमा एक करोड ५० लाख रुपैयाँ विनियोजन गरेको छ । यसमा अस्पतालले ३० प्रतिशत थप गरेर एक करोड ८० लाखबराबरको उपचार सेवा उपलब्ध गराउने कामपाले जानकारी दिएको छ । 

सेवा लिन कर्मचारी र जनप्रतिनिधिहरुलाई परिचयपत्र, ज्येष्ठ नागरिकलाई सामाजिक सुरक्षा भत्ता कार्ड, राष्ट्रिय परिचय पत्र, नागरिकता अनिवार्य आवश्यक कामपाले जनाएको छ ।