थानकोट ।

आगामी फागुन २१ गतेका लागि तय भएको प्रतिनिधिसभा सदस्यको निर्वाचनमा उमेदवारले गर्ने खर्चको सीमा तोकिएको छ । निर्वाचन आयोगले सुगम मानिएका जिल्लाका हकमा र दुर्गम मानिएका जिल्लाका हकमा फरकफरक खर्च सीमा निर्धारण गरेको हो ।

आयोगका अनुसार, काठमाडौंका पाँचवटा निर्वाचन क्षेत्रका उमेदवारले अधिकतम २५ लाख रुपैयाँ खर्च गर्न पाउनेछन् । त्यसमा काठमाडौं क्षेत्र नं १, ३, ६, ७ र ८ रहेका छन् । यसैगरी, १७ वटा निर्वाचन क्षेत्रका उमेदवारले अधिकतम २७ लाख रुपैयाँबराबरको खर्च गर्न पाउने सीमा निर्धारण गरिएको छ ।

त्यस्तै, ६५ वटा निर्वाचन क्षेत्रका उमेदवारले अधिकतम २९ लाख रुपैयाँबराबर खर्च गर्न पाउनेछन् । आयोगका अनुसार, ५२ वटा निर्वाचन क्षेत्रका उमेदवारले अधिकतम ३१ लाख, २६ वटा निर्वाचन क्षेत्रका उमेदवारले अधिकतम  ३३ लाख रुपैयाँबराबरको खर्च गर्न पाउनेगरी सीमा निर्धारण गरिएको आयोगका प्रवक्ता नारायणप्रसाद भट्टराईले जानकारी दिए ।

उनका अनुसार, उमेदवारले खर्च गर्दा बैंक वा वित्तीय संस्थामा छुट्टै खाता खोली सोही खाताबाट खर्च गर्नुपर्नेछ । त्यसरी खर्च गर्दा निजको तर्फबाट खर्च गर्ने जिम्मेवार अधिकारी तोकी निजको नाम नामेसीसहितको विवरण भने निर्वाचन अधिकृतको कार्यालयमा पेस गर्नुपर्नेछ ।

उमेदवारले तोकेको खर्चको हदभित्र रहेर निर्वाचन खर्च गर्न र प्रतिनिधिसभा सदस्य ऐनबमोजिम निर्वाचन खर्चको विवरण निर्वाचन परिणाम घोषणा भएको मितिले ३५ दिनभित्र निर्वाचन कार्यालयमा पेस गर्नुपर्नेछ ।

विज्ञप्तिमा उल्लेख अनुसार काठमाडाैं क्षेत्र नं. ९ र १० का उम्मेदवारले चुनावमा अधिकतम २७ लाख रुपैयाँसम्म खर्चन पाउनेछन् ।

काठमाडाैं क्षेत्र नं. १० मा चन्द्रागिरि नगरपालिका क्षेत्रका १० वटा वडा (२ देखी ११ सम्म्) , कीर्तिपुर र दक्षिणीकाली नगरका सबै क्षेत्र पर्दछन् ।

काठमाडाैं क्षेत्र नं. ९ मा काठमाडौं महानगरपालिकाको १२, १४, २१ र २२ नं वडा पर्छन् भने चन्द्रागिरि नगरपालिकाको वडा नं १, १२, १३, १४ र १५ र नागार्जुन नगरपालिकाको वडा नं ६, ७, ८, ९ र १० पर्छन् ।