थानकोट ।

प्रधानमन्त्री वालेन्द्र शाह(बालेन) मंगलबार बसेको प्रतिनिधि सभाको बैठकमा सहभागी भएका छन्। प्रधानमन्त्री शाह प्रश्नोत्तर कार्यक्रममा सहभागी भएको जेठ १७ गतेपछि पहिलो पटक संसद् बैठकमा उपस्थित भएका हुन्।

प्रधानमन्त्रीसँगै राष्ट्रिय स्वतन्त्र पार्टीका सभापति रवि लामिछाने पनि प्रतिनिधि सभा बैठकमा सहभागी भएका छन्।

यसअघि संसद् बैठकमा प्रधानमन्त्री शाहले दिएको अभिव्यक्तिलाई लिएर प्रतिपक्षी दलहरूले असन्तुष्टि जनाउँदै आएका छन्। उक्त विषयमा उनीहरूको विरोध र आपत्ति अझै जारी रहेको जनाइएको छ।

प्रतिनिधि सभाको पछिल्लो बैठकमा प्रधानमन्त्रीको उपस्थितिलाई राजनीतिक वृत्तमा चासोका साथ हेरिएको छ। संसद् गतिविधि र सरकार-प्रतिपक्ष सम्बन्धका विषयमा देखिएको बहसबीच प्रधानमन्त्रीको सहभागिता भएको हो।

मंगलबार बसेको प्रतिनिधि सभा बैठकमा सहभागी हुन प्रधानमन्त्री शाह र सभापति लामिछाने दिउँसो १ बजेर ३७ मिनेटमा संसद् भवन पुगेका थिए। उनीहरू बैठक कक्षमा प्रवेश गरी करिब २० मिनेट बसेपछि बाहिरिएका हुन्।

बैठकमा सहभागी हुनुअघि प्रधानमन्त्री शाहले सभामुख डोलप्रसाद अर्यालसँग करिब पाँच मिनेट छलफल गरेका थिए।

प्रधानमन्त्री र रास्वपा सभापतिको संसद् उपस्थितिलाई पछिल्लो राजनीतिक गतिविधिका सन्दर्भमा चासोका साथ हेरिएको थियो। यद्यपि उनीहरूको बैठक सहभागिता भने छोटो समयमै सीमित भएको छ।