थानकोट ।

नेपाल चिकित्सक संघले बुधबार पनि देशभरका सरकारी तथा निजी अस्पतालहरूमा आकस्मिक (इमर्जेन्सी) बाहेकका सबै स्वास्थ्य सेवा बन्द गरेको छ ।

वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको साङ्घातिक आक्रमण तथा अस्पतालमा गरिएको तोडफोडका दोषीहरूलाई कानुनी कारबाही गर्न सरकार उदासीन बनेको भन्दै संघले दोस्रो दिन पनि आन्दोलनलाई निरन्तरता दिएको हो ।

संघको आन्दोलनका कारण देशभरका अस्पतालहरूमा ओपीडी, नियमित स्वास्थ्य परीक्षण, शल्यक्रिया तथा अन्य गैरआकस्मिक सेवाहरू प्रभावित भएका छन् । यद्यपि, आकस्मिक सेवा भने सञ्चालनमा राखिएको छ ।

काठमाडौंका प्रमुख सरकारी अस्पतालहरूमा बिरामीको चाप उल्लेख्य रूपमा बढेको छ । विशेषगरी शिक्षण अस्पताल र वीर अस्पतालमा सेवा लिन आउने बिरामीहरूको भिड देखिएको छ । नियमित सेवा बन्द हुँदा उपचारका लागि आएका धेरै बिरामी निराश भएर फर्किन बाध्य भएका छन् भने केही बिरामी आकस्मिक सेवा वा वैकल्पिक अस्पतालको खोजीमा पुगेका छन् ।

नेपाल चिकित्सक संघले दोषीहरूलाई तत्काल कानुनी दायरामा ल्याई स्वास्थ्यकर्मीको सुरक्षा सुनिश्चित नगरेसम्म आन्दोलनका कार्यक्रमलाई थप कडा बनाउन सकिने चेतावनी दिएको छ ।

उता बिरामी तथा सर्वसाधारणले स्वास्थ्य सेवा अवरुद्ध हुँदा उपचारमा कठिनाइ भएको भन्दै सरकारले चिकित्सकहरूको जायज माग सम्बोधन गरी स्वास्थ्य सेवा यथाशीघ्र सहज बनाउनुपर्ने माग गरेका छन् ।

यता चन्द्रागिरि नगर प्राथमिक अस्पतालमा पनि ओपीडी, नियमित स्वास्थ्य परीक्षण, शल्यक्रिया तथा अन्य गैरआकस्मिक सेवाहरू प्रभावित भएका छन् । यद्यपि, आकस्मिक सेवा भने सञ्चालनमा राखिएको छ । यस अस्पतालमा दैनिक २ सय भन्दा धेरैको संख्यामा बिरामीहरू पुग्ने गरेका छन् ।

तस्बिरः जीवन नेपाल