थानकोट ।

एशियन गेम्समा लगातार दोस्रो पटक काँस्य पदक जित्दै नेपाली महिला कबड्डी टोली स्वदेश फर्किएको छ ।

अभाव, पूर्वाधारको कमी र कठिन तयारीका बाबजुद टोलीले हासिल गरेको यो उपलब्धिले नेपाली खेलकुदमा नयाँ उचाइ थपेको छ । टोलीलाई त्रिभुवन अन्तर्राष्ट्रिय विमानस्थलमा भव्य स्वागत गरिएको छ ।

त्रिभुवन अन्तर्राष्ट्रिय विमानस्थलमा ओर्लिँदा खेलाडीहरूको अनुहारमा पदकको चमक र देशका लागि केही गर्न सकेको सन्तोष स्पष्ट देखिन्थ्यो । सेमिफाइनलमा बलियो प्रतिद्वन्द्वी भारतसँग पराजित भए पनि नेपालले समग्र प्रदर्शनमा आफूलाई अब्बल साबित गर्‍यो ।

कप्तान मानमति विष्टले भनिन्, ‘हामीले फाइनल खेल्ने सपना देखेका थियौँ, तर लगातार दोस्रो पटक पदक जितेर देशको प्रतिष्ठा जोगाउन सफल भयौँ । यो सफलता हाम्रो र राष्ट्रको विश्वासको जित हो ।’

टोलीले तयारीका क्रममा नेपालमा गएको बाढी पहिरोको घटनाबाट मानसिक रूपमा निकै पीडा महसुस गरेको थियो । कप्तान विष्टले यो पदक देशमा बाढीका कारण पीडित बनेका नागरिकहरूलाई समर्पित गरिन् । टोलीले प्रशिक्षणका क्रममा भारतमा बस्दा देशको अवस्था सम्झेर आफूहरू भावुक बनेको स्मरण गरिन् ।

प्रमुख प्रशिक्षक पार्वती राईका अनुसार यो सफलता खेलाडीहरूको निरन्तरको मेहेनत र अनुभवको उपज हो ।

उनले भनिन्, ‘खेलाडीहरूमा आत्मविश्वास बढ्दो छ, तर पदकको रङ बदल्नका लागि अब पूर्वाधार र पोषणमा ध्यान दिनु जरुरी छ । बिना ग्राउन्ड र आधुनिक हलको तयारीमा पनि हामीले इतिहास त रच्यौँ, तर अब राज्यले कबड्डीको छुट्टै संरचना र खेलाडीका लागि सन्तुलित आहारको व्यवस्था गर्नुपर्छ । कोच र खेलाडीबीचको भावनात्मक सम्बन्ध र अनुशासनले नै हामीलाई यहाँसम्म पुर्‍याएको हो । अबको लक्ष्य भनेको प्रशिक्षणको स्तरवृद्धि गर्दै स्वर्ण पदक तर्फको यात्रा तय गर्नु हो । सरकारले सहयोग गरेमा नेपाली कबड्डी टोली विश्वस्तरमै थप चम्किने पक्का छ ।’

उनले अबको लक्ष्य प्रशिक्षणको स्तरवृद्धि गर्दै स्वर्णपदक तर्फको यात्रा तय गर्नु रहेको बताइन् । सरकारले सहयोग गरे स्वर्ण पदक प्राप्त गर्न असम्भव नरहेको बताइन् ।