थानकोट ।

चन्द्रागिरि नगरपालिका-१४ नैकापस्थित नैकाप फुटबल मैदानमा जारी नैकाप गोल्डकप फुटबल प्रतियोगिताको छैठाैं संस्करणअन्तर्गत आज पनि २ खेल हुनेछन् ।

आज हुने खेलका विजेता टोलीहरू अन्तिम ८ का लागि छनोट हुनेछन् ।

प्रतियोगिताको दोश्रो चरणअन्तर्गत दिनको पहिलो खेलमा दिउँसो १ बजे पुल ए मा रहेका वाणस्थली यूथ सोसाइटी र बार्सा नेपालबीच खेल हुनेछ ।

वाणस्थलीले पहिलो चरणमा सेतीदेवी यूथ क्लबको चुनाैती पन्छाएको थियो भने बार्सा नेपालले पहिलो चरणमा ल्याक्टो लक्ष्यलाई पराजित गर्दै वाणस्थलीसँगको भेट पक्का गरेको हो ।

यसैगरी आज नै हुने दिनको दोश्रो खेलमा दिउँसो ३ बजे पुल डी मा रहेको भीमसेन यूथ क्लबले महादेव यूथ क्लबको चुनाैती सामना गर्नेछ ।

भीमसेन यूथले पहिलो चरणमा किटीनी भज्याङ्ग यूथ क्लबलाई पराजित गर्दै दोश्रो चरणमा महादेव यूथसँगको भेट पक्का गरेको थियो भने महादेव यूथले पहिलो चरणमा कार्की यूथ क्लबलाई पराजित गरेको थियो । 

प्रतियोगिताअन्तर्गत मंगलबार सम्पन्न खेलहरुमा प्रतिस्पर्धाविरुद्ध जित हात पार्दै मध्यपुर जागरुक र कुर्दनले अन्तिम ८ मा स्थान सुरक्षित गरेका छन् ।

चन्द्रागिरि स्पोर्ट्स एकेडेमीको आयोजनामा जारी छैठाैं नैकाप गोल्डकप प्रतियोगिताको विजेताले ५ लाख रूपैयाँ पुरस्कार पाउनेछ ।