थानकोट ।

इलाम गोल्डकप फुटबल प्रतियोगिताको उपाधि मछिन्द्र फुटबल क्लब, काठमाडौँले हात पारेको छ ।

यससँगै मछिन्द्रले नगद १० लाख रुपैयाँसहित ट्रफी र मेडल प्राप्त गरेको छ ।

गत वैशाख ५ गतेदेखि सुरु भएको प्रतियोगिताको शनिबार सम्पन्न फाइनल खेलमा डिफेन्डिङ च्याम्पियन न्युरोड टिम (एनआरटी) लाई शून्यका विरुद्ध दुई गोल गर्दै मछिन्द्रले उपाधि जितेको हो ।

इलामको ठुलो टुँडिखेलमा भएको प्रतिस्पर्धात्मक फाइनल खेलको ४७ औँ मिनेटमा मछिन्द्रका सौरभ लिम्बूले पहिलो गोल गरेका थिए ।

खेलको ५० औँ मिनेटमा मिलन राईले अर्को गोल थप्दै टोलीको जित सुनिश्चित गरे ।

अघिल्ला दुई संस्करणको विजेता एनआरटीले गोल गर्ने थुप्रै अवसर प्राप्त गरे तापनि सफल हुन सकेन र उपविजेतामा चित्त बुझाउनु पर्यो । एनआरटीले नगद ५ लाख रुपैयाँ प्राप्त गरेको छ ।

फाइनल खेलको ‘म्यान अफ द म्याच’ मछिन्द्रका प्रदीप बुढाथोकी घोषित भए । उनले नगद ८ हजार १०० रुपैयाँ प्राप्त गरे ।

प्रतियोगितामा आठ टोली सहभागी थिए ।

तस्बिर : कोकिला ढकाल