थानकोट ।

खाद्य प्रविधि तथा गुण नियन्त्रण विभागले प्रयोगशाला परीक्षणमा न्यूनस्तर पाइएका वाईवाईसहित चार ब्रान्डका चाउचाउका निश्चित ब्याच बजारबाट तत्काल फिर्ता गर्न आदेश दिएको छ।

विभागले बजार अनुगमन तथा निरीक्षणका क्रममा सङ्कलन गरिएका नमुना प्रयोगशालामा परीक्षण गर्दा बर्दियाको बाँसगढी–३ स्थित बी.सी.जी. फुड्स इन्टरप्राइजेज प्रालिबाट उत्पादित चारवटा चाउचाउ न्यूनस्तर पाइएको जनाएको छ।

विभागका अनुसार बजारबाट फिर्ता गर्न आदेश दिइएका उत्पादनमा गोलमोल ब्रान्डको २५ ग्रामको इन्स्ट्यान्ट नुडल्स, वाईवाई ब्रान्डको ६० ग्रामको इन्स्ट्यान्ट नुडल्स, प्रिमियम पिरो ब्रान्डको २५ ग्रामको इन्स्ट्यान्ट नुडल्स र मामा ब्रान्डको ६० ग्रामको इन्स्ट्यान्ट नुडल्स छन्।

विभागले गोलमोल ब्रान्डको ब्याच नम्बर बी/बीएम२ सी, २०८३.०१.११, उत्पादन मिति २०८३/०१/११ र उत्पादन मितिदेखि १२ महिनासम्म उपभोग गर्न मिल्ने उल्लेख भएको चाउचाउ फिर्ता गर्न भनेको छ।

त्यसैगरी, वाईवाई ब्रान्डको ब्याच नम्बर बी/बीएम१–एक्स–२०२६–०५–१४, उत्पादन मिति २०२६/०५/१४ र उत्पादन मितिदेखि १२ महिनासम्म उपभोग गर्न मिल्ने उल्लेख भएको ६० ग्रामको चाउचाउ पनि फिर्ता गर्न आदेश दिइएको छ।

प्रिमियम पिरो ब्रान्डको ब्याच नम्बर बी/बीएम२, सी, २०८३.०१.२८, उत्पादन मिति २०८३/०१/२८ तथा उत्पादन मितिदेखि १२ महिनासम्म उपभोग अवधि उल्लेख भएको २५ ग्रामको चाउचाउ पनि फिर्ता गर्नुपर्ने सूचीमा छ।

यस्तै, मामा ब्रान्डको ब्याच नम्बर बी/बीएम१–एक्स–२०२६–०५–१३, उत्पादन मिति २०२६–०५–१३ र उत्पादन मितिदेखि १२ महिनासम्म उपभोग गर्न मिल्ने उल्लेख भएको ६० ग्रामको चाउचाउसमेत बजारबाट फिर्ता गर्न विभागले निर्देशन दिएको छ।

विभागका अनुसार परीक्षण गरिएका नमुना खाद्य स्वच्छता तथा गुणस्तर ऐन, २०८१ को दफा १६(क) विपरीत न्यूनस्तरको पाइएको हो।

विभागले सोही ऐनको दफा ३८ को उपदफा (२) अनुसार सम्बन्धित ब्याचका सबै उत्पादन बजारबाट तत्काल फिर्ता गर्न र उपदफा (४) अनुसार बिक्री-वितरण नगर्न तथा नगराउन आदेश दिएको छ।