थानकोट । 

मौसम पूर्वानुमान महाशाखाले तिहार विशेष मौसम बुलेटिन जारी गर्दै सो समयको मौसमबारे जानकारी गराएको छ ।

महाशाखाले बुधबार (कात्तिक १८) विशेष बुलेटिन जारी गर्दै तिहारको मौसमबारे जानकारी गराएको हो ।

महाशाखाका अनुसार, यस वर्ष तिहारको समयमा पश्चिमी वायुको सामान्य प्रभाव मात्र रहने देखिन्छ ।

हेर्नुस् तिहारको कुन दिन कस्तो रहनेछ मौसम ?

कात्तिक २१ गते (शनिबार) काग तिहार

देशको हिमाली र पहाडी भू-भागमा आंशिक बादल लाग्ने र तराई भूभागमा मौसम मुख्यतया सफा रहनेछ ।

कोसी, वाग्मती र गण्डकी प्रदेशको हिमाली भू-भागका थोरै स्थान, लुम्बिनी, कर्णाली र सुदूरपश्चिम प्रदेशको हिमाली तथा देशको सबै पहाडी भू-भागका एक-दुई स्थानमा हल्का वर्षा र हिमपातको सम्भावना छ ।

तराई भूभाग, उपत्यका तथा खोँचहरूमा बिहानपख थोरै स्थानमा हुस्सु कुहिरो लाग्नेछ ।

कात्तिक २२ गते (आइतबार) लक्ष्मी पूजा

देशको हिमाली र पहाडी भू-भागमा आंशिक बादल लाग्ने र तराई भूभागमा मौसम मुख्यतया सफा रहनेछ । देशका हिमाली भू-भागका थोरै तथा पहाडी भू-भागका एक-दुई स्थानमा हल्का वर्षा र हिमपातको सम्भावना छ ।

तराई भू-भाग, उपत्यका तथा खोँचहरूमा बिहानपख थोरै स्थानमा हुस्सु र कुहिरो लाग्नेछ ।

कात्तिक २३ गते (सोमबार) औँसी

देशको हिमाली र पहाडी भू-भागमा आंशिक बादल लाग्ने र तराई भू-भागमा मौसम मुख्यतया सफा रहनेछ ।

हिमाली भू-भागका एक-दुई स्थानमा हल्का वर्षा र हिमपातको सम्भावना छ । तराई भू-भाग, उपत्यका तथा खोँचहरूमा बिहानपख थोरै स्थानमा हुस्सु कुहिरो लाग्नेछ ।

कात्तिक २४ गते (मंगलबार) गोवर्धन पूजा

हिमाली र पहाडी भू-भागमा तथा कोसी प्रदेशको तराई भू-भागमा आंशिक बादल लाग्ने र बाँकी तराई भू-भागमा मौसम मुख्यतया सफा रहनेछ ।

हिमाली भूभागका एक-दुई स्थानमा हल्का वर्षा र हिमपातको सम्भावना छ । तराई भू-भाग, उपत्यका तथा खोँचहरूमा बिहानपख थोरै स्थानमा हुस्सु र कुहिरो लाग्नेछ ।

कात्तिक २५ गते (बुधबार) भाइटीका

हिमाली र पहाडी भू-भागमा आंशिक बादल लाग्ने र तराई भू-भागमा मौसम मुख्यतया सफा रहनेछ ।

देशको हिमाली र पहाडी भू-भागका एक-दुई स्थानमा हल्का वर्षा र हिमपातको सम्भावना छ । तराई भूभाग, उपत्यका तथा खोँचहरूमा बिहानपख थोरै स्थानमा हुस्सु र कुहिरौ लाग्ने महाशाखाको पूर्वानुमान छ ।