मातातिर्थमा मोटरसाइकल दुर्घटना, चालकको मृत्यु, एकजना घाइते
थानकोट ।
चन्द्रागिरि नगरपालिका–८ मातातिर्थस्थित सशस्त्र प्रहरी बल नेपालको शिक्षालय नजिकैको मोडमा मोटरसाइकल दुर्घटना हुँदा चालकको मृत्यु भएको छ ।
शुक्रबार साँझ ६ बजे भएको सो दुर्घटनामा कञ्चनपुर, बेलौरी बस्ने अन्दाजी २५ वर्षीय रमेश चौधरीको मृत्यु भएको प्रहरीले जनाएको छ ।
मकवानपुरबाट सतुङ्गलतर्फ आउँदै गरेको बा.प्र.०२–०२० प २७६६ नम्बरको बुलेट मोटरसाइकल अनियन्त्रित भई सडकबाट करिब १० मिटर तल खस्दा चौधरीको मृत्यु भएको हाे ।
दुर्घटनामा मोटरसाइकल पछाडि सवार जिल्ला कञ्चनपुर, पुनर्वास नगरपालिका–६ घर भई हाल काठमाडौँ जिल्ला, कीर्तिपुर बस्ने अन्दाजी ४३ वर्षीय मेकबहादुर वाइबा घाइते भएका छन् ।
चौधरीको उपचारका क्रममा साँझ ७ बजे मृत्यु भएको हो । वाइबाको अवस्था भने मध्यम रहेको प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ।










