र अहिले त्यो प्रभावित भएको स्रोतको भनाइ छ । काठमाडौंको चन्द्रागिरि र नवलपरासीको मौलाकालिका केबलकारमा तोडफोड हुँदा करिब ६ सय रोजागरी प्रभावित भएको बताइएको छ । चन्द्रागिरी केबलकारमा करिब साढे ३ सय र मौलाकालिका केबलकारमा करिब २ सय रोजगार छन् ।

आइतबारसम्म प्राप्त तथ्यांकअनुसार मुलुकभर रहेका बैंक तथा वित्तीय संस्थाका ६८ शाखा र एक्सटेन्सन काउन्टरमा तोडफोड तथा आगजनी भएको छ । तीमध्ये २५ शाखा कार्यालय र ४३ वटा एक्सटेन्सन काउन्टर छन् । ती शाखा तथा एक्सटेन्सन काउन्टरमा धेरै क्षतिको विवरण भने छैन । क्षति पुगेको भनिएकामध्ये एउटा झ्यालको सिसा फुटेकोदेखि आगजनी भएकासम्म छन् । एउटा शाखा र काउन्टर स्थापना गर्दा लाग्ने खर्च समान हुँदैन । बैंकहरूले ग्राहकको चाप, आफ्नो गुडविललगायत आधारमा शाखामा खर्च गर्ने गरेका हुन्छन् । शाखा तथा एक्सटेन्सन काउन्टरमा कार्यरत कर्मचारीको संख्यामा पनि एकरूपता हुदैन । सामान्यतया बैंकको एक शाखामा न्यूनतम ३ देखि २० जनासम्म कर्मचारी रहन्छन् ।

एक्सटेन्सन काउन्टरमा २ देखि ३ जनासम्म कर्मचारी हुन्छन् ।

एउटा शाखा वा काउन्टरमा क्षति पुग्दैमा ती कर्मचारीको रोजगारी गुम्यो भन्ने हुँदैन । सीधै बैंकका शाखा तथा एक्सटेन्सन काउन्टरमा आगजनी तथा तोडफोड भएका घटना कम छन् । सरकारी कार्यालय मालपोत, यातायात, राजस्व कार्यालयलगायत स्थानमा रहेका बैंकका शाखा तथा एक्सटेन्सन काउन्टरमा क्षति पुगेको बताइएको छ । सरकारी तथा निजी संस्थामा आगजनी तथा तोडफोड हुँदा तिनका छेउमा रहेका बैंकका शाखा, काउन्टर र एटीएम बुथमा क्षति पुगेको देखिन्छ ।

प्रदर्शनकारीहरूले विभिन्न बैंकका ६८ शाखा र ६९ एटीएममा क्षति पुर्याएको नेपाल राष्ट्र बैंकका गभर्नर विश्वनाथ पौडेलले बताए । अर्थ मन्त्री रामेश्वर खनालको पदभार ग्रहण कार्यक्रममा सोमबार गभर्नर पौडेलले यस्तो बताएका हुन् । ‘प्रदर्शनका कारण बैंकका ६८ वटा शाखा र ६९ वटा एटीएममा क्षति पुगेको छ, यद्यपि यो समय मानिसहरूको मनोबल बढाउने हो, जे घटना घट्यो, त्यो ज्यादै दुःखद छ । राष्ट्र बैंक सक्दो सहयोग गर्न तयार छ,’ उनले भने । यति धेरै शाखा र एटीएम बुथमा क्षति पुगे पनि हालसम्म मानवीय क्षति, नगद चोरी तथा लुटपाटका घटना नभएको राष्ट्र बैंकले जनाएको छ ।

निजी लगानीका धेरै आवास, उद्योग, व्यवसाय, संघसंस्थालगायतमा पनि तोडफोड तथा आगजनी भएको छ ।

प्रदर्शनका क्रममा उद्योगीका निजी आवासदेखि व्यावसायिक संघसंस्थाका भौतिक संरचनामा ठूलो संख्यामा क्षति पुगेकाले त्यहाँ पनि रोजगारी प्रभावित भएको हुन सक्ने अनुमान छ ।

प्रदर्शनकारीले आधा दर्जनभन्दा बढी शैक्षिक संस्थामा पनि आगजनी तथा तोडफोड गरेका छन् । खुमलटार र बाँसबाँरीस्थित युलेन्स, पुरानो बानेश्वरस्थित ग्लोबल कजेल अफ म्यानेजमेन्ट, कालोपुलस्थित जेभियर इन्टरनेसनल, कुपान्डोलस्थित नाइटिंगेललगायत शैक्षिक संस्थामा आगजनी तथा तोडफोड गरिएको उच्च शिक्षालय तथा माध्यमिक विद्यालय संघ नेपाल (हिसान) का महासचिव लोक भण्डारीले जनाए । यी लगायत के–कति संस्थामा पनि धेरै रोजगारी प्रभावित भएको बताइएको छ । 

सतुङ्गलस्थित चाैधरी ग्रुपका विभिन्न ५ कम्पनीमा करिब ७५० जना कार्यरत थिए भने चेकपोष्ट खानेपानी चोकस्थित विशाल ग्रुपको गोदाममा सयाैं स्थानीयहरूले रोजगारी पाएका थिए ।