थानकोट ।

बागमती प्रदेश सरकारको आगामी आर्थिक वर्ष २०८३/८४ को वार्षिक नीति तथा कार्यक्रम बहुमतले पारित भएको छ ।

मंगलबार बसेको प्रदेशसभा बैठकमा सरकारको नीति तथा कार्यक्रममाथि परेको संशोधनको प्रस्ताव बहुमत अस्वीकृत गरेको थियो ।

प्रदेश सभा सदस्यहरू रत्नप्रसाद ढकाल, लक्ष्मी घिमिरे, सुष्मा भुजेल न्यौपाने र युवराज चौलागाईँले वार्षिक नीति तथा कार्यक्रमलाई थप संशोधन गर्न आवश्यक भएको भन्दै छुट्टाछुट्टै प्रस्तावहरू पेस गरेका थिए । ती प्रस्तावहरू बहुमतले अस्वीकृत गरेको थियो ।

मुख्यमन्त्री ईन्द्रबहादुर बानियाँले प्रदेश सभाको सोमबार बसेको बैठकमा प्रदेश सरकारको आव २०८३/०८४ को वार्षिक नीति तथा कार्यक्रममाथि छलफलको प्रारम्भ गरियोस् भनि प्रस्ताव पेस गरेका थिए ।

प्रदेश सभाको आजको बैठकमा सरकारको नीति तथा कार्यक्रममाथि प्रदेश सभाका सदस्यहरूले छलफलमा उठाएका प्रश्नहरूको जवाफ दिँदै मुख्यमन्त्री बानियाँले नीति तथा कार्यक्रमका आधारमा आगामी १ असारमा ल्याइने बजेट समानुपातिक, निष्पक्ष पारदर्शी र जनमुखी हुने बताए ।

दुई दिनसम्म चलेको छलफलमा ६४ जना प्रदेश सभा सदस्यहरूले भाग लिएका थिए ।

प्रदेश सभाका उपसभामुख अप्सरा चापागाईँले प्रदेश सभाको अर्को बैठक ३१ जेठ अपराह्न १ बजे बस्नेगरी स्थगित भएकाे जानकारी दिइन् ।