थानकोट ।

गोरखाको बूढीगण्डकी नदीमा आएको बाढीबाट प्रभावित ४९ जनालाई नेपाली सेनाले सकुशल उद्धार गरेको छ।

आइतबार आएको बाढीपछि नेपाली सेनाले एमआई–१७ सहित चारवटा हेलिकोप्टर तथा स्थलमार्गबाट सुरक्षाकर्मी परिचालन गरी विभिन्न स्थानमा फसेका व्यक्तिहरूको उद्धार गरेको हो।

नेपाली सेनाका अनुसार जगतबाट गोरखासम्म ६ जना, फिलिमबाट हुल्चुकसम्म एक शिशुसहित चार जना, यारुबाट हुल्चुकसम्म दुई बालक र एक विदेशी नागरिकसहित १५ जनालाई उद्धार गरिएको छ।

त्यस्तै, हुल्चुकबाट फिलिमसम्म एक जना, नाम्रुङबाट फिलिमसम्म दुई जना, न्याक्फेदीबाट न्याकडाँडासम्म नौ जना र पायुबाट सल्लेरीस्थित नयाँबस्तीसम्म १२ जनालाई हेलिकोप्टरमार्फत सुरक्षित स्थानमा पुर्‍याइएको सेनाले जनाएको छ।

बाढी प्रभावित क्षेत्रमा अन्य सुरक्षा निकाय तथा सरोकारवालासँगको समन्वयमा थप खोज तथा उद्धार कार्य जारी रहेको नेपाली सेनाले जनाएको छ।