थानकोट ।

नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ पाँचदिने श्रीलंका भ्रमण पूरा गरी आइतबार स्वदेश फर्किएका छन्।

त्रिभुवन अन्तर्राष्ट्रिय विमानस्थलमा उनलाई पार्टीका नेता तथा कार्यकर्ताले स्वागत गरेका थिए।

भ्रमणका क्रममा दाहालले इन्टरनेसनल पिपुल्स एसेम्बलीको आयोजनामा भएको ‘ह्यान्ड्स अफ एसिया’ नामक अन्तर्राष्ट्रिय सम्मेलनमा प्रमुख वक्ताका रूपमा सम्बोधन गरेका थिए।

श्रीलंकामा रहँदा उनले त्यहाँका विभिन्न वामपन्थी राजनीतिक दलका नेतृत्वसँग भेटवार्ता तथा छलफल गरेका थिए। यस क्रममा श्रीलंकाको कम्युनिस्ट पार्टीका महासचिवसहित पोलिटब्युरो सदस्यहरूसँग द्विपक्षीय राजनीतिक विषयमा संवाद भएको थियो।

त्यस्तै, श्रीलंकाको सत्तारुढ जनता विमुक्ति पेरामुना (जेभीपी) का महासचिव तिल्भिन सिल्भा तथा उक्त दलको पोलिटब्युरोसँग पनि दाहालले भेटवार्ता गरेका थिए।

भ्रमण अवधिमा उनले विभिन्न मुलुकबाट सम्मेलनमा सहभागी राजनीतिक दलका प्रतिनिधि, सामाजिक अभियन्ता, अनुसन्धानकर्ता तथा प्रगतिशील विचारकहरूसँग समेत छलफल गरेका थिए।

दाहाल गत १५ जुलाईमा श्रीलंका पुगेका थिए। भ्रमणका क्रममा उनले क्षेत्रीय राजनीति, वामपन्थी आन्दोलन र अन्तर्राष्ट्रिय सहकार्यसँग सम्बन्धित विषयमा विभिन्न पक्षसँग विचार आदानप्रदान गरेको बताइएको छ।