थानकोट ।

१५औं केन्द्रीय राष्ट्रपति रनिङ खेलकुदको दोस्रो दिन बिहीबार चन्द्रागिरि नगरपालिका वडा नं. ९ मच्छेगाउँका प्रथम मानन्धरले कराते खेलमा स्वर्ण पदक जितेका छन् ।

मच्छेगाउँस्थित न्यू होराइजन एकेडेमीमा कक्षा १० मा अध्ययनरत मानन्धरले बागमती प्रदेशको प्रतिनिधित्व गर्दै प्रतियोगितामा सहभागिता जनाएका थिए । उनले करातेको एकल कातामा सो पदक जितेको प्रथमका प्रशिक्षक तथा बुबा रवीन्द्र मानन्धरले जानकारी दिए ।

उनले नगर, जिल्ला र प्रदेश राष्ट्रपति रनिङ शिल्डमा समेत स्वर्ण जितेका थिए ।

बुधबार राष्ट्रपति रामचन्द्र पौडेलबाट त्रिपुरेश्वरस्थित दशरथ रंगशालामा आयोजित १५ औं केन्द्रीय राष्ट्रपति रनिङ सिल्ड खेलकुद प्रतियोगिताको एक भव्य समारोहबीच उद्घाटन गरेका थिए ।